Kusog nga ulan miresulta sa pagbaha

"ALERTO."

Kini ang mahulagway sa mga katawhan sa siyudad dihang nasinati ang kusog nga pag-ulan ug pagsaka sa tubig nga miresulta sa pagbaha sa pipila ka barangay sa siyudad sa Cagayan de Oro.

Pipila ka mga residente labi na sa Barangay 26, ning siyudad ang nanghipos na daan sa gamit. Ni-andam sa ilang bag nga adunay sulod nga flashlight, pisi ug uban pang importanteng gamit. Gi-fully charged usab dayon ang mga cellphone kini inkaso nga mapalong ang kuryente taliwala sa kusog nga ulan.

Si Kapitan Alexander Dela Cerna nibutyag nga tungod sa nahitabong Bagyong Sendong niadtong Disyembre, daghan sa katawhan ang na-trauma. Daghan ang nahadlok nga basin unya ang pag-ulan molangtod sa kagabhion ug mosaka pa pag-ayo ang tubig.

Ang nahitabong Sendong maoy nagsilbing leksyon sa katawhan nga panahon sa ulan, kinahanglan gyod mangandam.

Pipila sa mga barangay ning siyudad ang nabahaan, miabot sab sa taga hawak ang tubig ug nalunupan na usab ang tunghaan sa Mindanao University of Science and Technology (MUST) diin pipila ka mga tinun-an na-stranded.

Gani, dali usab nga nakatubag ug alerto ang opisyal sa siyudad tungod kay deretso usab dayon nga nakapadala og mga dump truck ug mga sakyanan aron sakyan sa mga tinun-an nga makagawas.

Dili usab tiaw ang kahuot sa dagan sa trapiko tungod kay daghan kaayo sa mga motorela, pribadong sakyanan ug uban pa nga mga pasaherong sakyanan ang napalungan sa ilang mga makina.

Pipila sa barangay nga nabahaan mao ang Kauswagan, Bulua, Camaman-an, Barangay 26, Barangay 22, Lapasan, Tablon ug Barangay 35.

Basi sa Philippine Atmospheric, Geophysical and Astronomical Services Administration, dili bagyo ang nasinating pag-ulan ug bunga lamang sa Intertropical Convergence Zone (ITCZ) nga mi-epekto sa Southern Luzon, Visayas ug Mindanao.

Gipasalamatan nga pipila ka oras gikan sa pag-ulan ug pagbaha wala na kini kaayo nipadayon apan nagbilin og grabe nga lapok sa pipila ka bahin sa siyudad.