Lolo giatake sulod sa multicab, patay

DEAD on arrival sa Northern Mindanao Medical Center (NMMC) ang usa ka lolo human giingong giatake sulod mismo sa multicab nga de pasaheroan niadtong Sabado mga alas 12:30 sa udto sa Cogon ning siyudad sa Cagayan de Oro.

Giila ang biktima nga mao Marcelo Muga, 81, taga Sitio Bato, Indahag ning siyudad.

Sa inisyal nga imbestigasyon sa kapolisan sa Police Station 2 (PS2) sa Cogon, nasuta nga misakay ang biktima sa multicab nga nagdala og plaka KVH-224, gimaneho ni Joel Mellalos.

Gikan sa Indahag ang biktima ug misakay paingon sa merkado sa Cogon apan ang driver nakamatikod nga nagpiyong-piyong kini. Pag-abot sa Cogon, nanaog na tanan pasahero ug kini na lamang ang nabilin sa multicab, hinungdan nga iyang gipukaw.

Nakulbaan gamay ang driver tungod kay dili kini motubag ug wala na milihok, hinungdan nga dali dayon niya kining gidala sa (NMMC).

Apan paghidangat sa maong balay tambalanan, gideklarar kini sa doktor nga dead on arrival.

Gituohang giatake sa kasing-kasing o cardiac arrest ang namatyan sa biktima.

Ang kapolisan sa PS2 nag-advise usab sa hingtungdan sa biktima nga kung mahimo ipa otopsiya ang patayng lawas niini aron dili mahimong kwestyonable ang kamatayon niini.