Naligo sa beach gipusil

KRITIKAL ang kahimtang sa usa ka lalaki human gipusil sa wala mailing suspek samtang naglipay-lipay kagahapon sa kaadlawon sa usa ka beach resort sa Madrid, Looc, lungsod sa Villanueva, Misamis Oriental.

Giila ang biktima nga mao si Anthony Satulombong, 20, residente sa susamang dapit.

Nasayran nga nangaligo ang biktima kuyog ang iyang mga higala sa Acquiros Beach resort niadtong Sabado.

Nasayran nga nag-overnight ang mga higala niadtong tungora kay adunay giselebrar apan tungod kay nahutdan man og ilimnong makahubog, nagboluntaryo si Satulombong nga maoy mopalit sa inom.

Igo lang nakapalit ang biktima aron mobiya na sa tindahan dihang kalit lang kining gipusil sa wala mailang suspetsado makatulo ka higayon.

Daling midagan ang mga higala niini ug gitabang ang biktima ug maoy ilang nakita nagbuy-od nga nagkadugo ang lawas niini.

Samad sa likod, tiyan ug lawas ang naangkon niini nga daling gidala sa mga kauban sa Northern Mindanao Medical Center ning siyudad sa Cagayan de Oro kinsa ubos pa sa oberbasyon sa mga doktor human talandugon ang kahimtang.

Ang kaso giimbestigahan pa sa Villanueva Police Station human giingong dili lang kini ang unang insidente sa pagpamusil. (SVB)