Lalaki patay human ulo nabunal

NABUNAL ang ulo sa windshield, maoy hinungdan sa kamatayon sa usa ka lalaki nga nabangga niadtong Lunes mga alas 8:40 sa gabii sa Rosario Limketkai Avenue, ning siyudad sa Cagayan de Oro.

Si Senior Police Officer 2 Ricky Amparado, traffic investigator sa Roads and Traffic Administration (RTA), niila sa biktima pinaagi sa nakuha gikan niini nga drivers license nga mao si Christopher Bahian, hingkod ang edad, taga Camaman-an ning siyudad.

Sa pakighinabi sa Sun.Star SuperBalita ngadto kang Amparado, gibutyag niini nga gikan sa Lapasan Highway si Bahian sakay sa motorsiklo ug ni-shortcut kini sa dalan Rosario Avenue, apan kalit lang miliko ang usa ka elf nga gimaneho usab ni Jomar Calinawan, taga Quezon, probinsya sa Bukidnon hinungdan sa maayong pagkasungag sa duha.

Nakita nga nabunal ang ulo ni Bahian sa windshield sa elf ug nahulog kini paingon sa semento nga sa ikaduhang higayon maayong pagkabunal sa ulo nga maoy hinungdan sa iyang hinanaling kamatayon.

Matud ni Amparado nga tungod kay duna pay ginahwa ang biktima dali kining gitabang ug gidala sa Maria Reyna Hospital apan pipila ka oras ang nilabay nakabsan kini sa iyang kinabuhi.

Sa pagsulat ning balita, wala pa nakabisita sa ospital ang pamilya sa biktima ug kasamtangan nga wala pay ni-claim.

Samtang boluntaryo man usab nga mitahan ang driver sa elf ug namugos nga dili siya mabasol sa hitabo tungod kay walay headlight ang motorsiklo sa biktima ug wala pa gyod nagsul-ob og helmet niadtong gabhiona.