Lolo, lola naligsan

DUHA ka mga biktima ang pulos nilanding sa balay tambalanan human naligsan sa managlahi nga dapit denhi sa siyudad sa Cagayan de Oro.

Giila ang unang biktima nga mao si Hermano Landig 65, minyo, taga Poblacion, lungsod sa Tagoloan, Misamis Oriental.

Gibutyag sa apo niini nga maoy nidala sa biktima sa Northern Mindanao Medical Center (NMMC) nga gikan ang iyang lolo nga nagkaon sa paniudto tabok sa kalsada apan pagtabok niini aron mouli kalit lang kining naligsan sa naghaguros nga dyip hinungdan sa mga naangkon niining bun-og sa lawas ug pangos.

Hinuon ang dyip wala mipasagad human sa insidente kay kini mismo ang nidala sa biktima sa NMMC ug nipasalig abagahon ang tanan balayrunon.

Rason sa driver nga kalit lang nitabok si Landig nga wala nagtan-aw sa dalan kung aduna bay niagi nga sakyanan ug deretso nalang dayon nga mitabok sa kalsada.

Ikaduhang biktima mao si Josefa Gonzales, 70, balo, residente sa Barangay Camaman-an, ning siyudad, ang naligsan sa pick-up niadtong Martes mga alas 7 sa gabii sa dalan Jr. Borja Extension ning siyudad.

Nasayran gikan sa merkado sa Cogon ang biktima dihang kalit lang kining naligsan sa naghaguros nga pick-up ug gibyaan lamang ang biktima.

Ang mga saksi nalamang maoy nidala niini sa NMMC tungod kay misibat man ang pick up nga nakabangga sa biktima.

Ang biktima ubos pa sa obserbasyon sa mga doktor ning panahona. (SVB)