‘Sendong’ survivors nagwelga

GATUSAN ka mga “Sendong” survivor ang nag-welga atubangan sa buhatan sa Department of Social Welfare and Development (DSWD) sa Northern Mindanao aron ipaabot sa buhatan nga wala nila nabati nga adunay hinabang nga niabot kanila.

Pito ka bulan gikan nahitabo ang Bagyong Sendong diin naghatag og kasakit sa pipila human daghan ang nakabsan sa kinabuhi, pipila nagpabiling missing ug liboan ka pamilya nawad-an sa puloy-anan.

Si Ernesto Abhar, kinsa nagsilbing tigpamaba sa mga “Sendong” survivor, niingon nga lisod kaayo tungod kay ilang nakita nga adunay mas gipaboran sa pag-apod og hinabang.

Usa sa gi-example niini ang mga balay nga partially damage giingong nahimo kining totally damaged. Gikwestyon usab sa grupo ang hinabang gikan sa nasod kung asa kini napaingon ug gusto sa grupo nga matubag kining ilang mga yangongo.

Matud ni Abhar nga sila ang angay nga mas prayoridad sa benipisyo labina sila ang nangawad-an sa puloy-anan ug maglisod sila sa pagbangon.

Gibutyag niini nga usa ang Macanhan nga bahin nga grabeng naigo sa baha ug daghang nawad-an og puloy-anan apan daw dili patas ang pagtabang tungod sa giingong adunay mas gi-prayoridad.

“Daghan kulang sa gobyerno ug unta ilang makita nga kulang ang paghatag sa serbisyo,” matud sa tigpamaba.

Gusto usab ipaabot sa grupo nga unta makab-ot kining ilang gihangyo ngadto kang DSWD Secretary Dinky Soliman ug Presidente Benigno Aquino III.

Ilang gibutyag nga ila lamang kining gipaabot tungod kay basin unya ang mga kadagkoan niini sa maong buhatan wala masayod niini. Dugang pa nga imbes unta nga tuwid na daan ang mahiaguman apan wala nibaliko hinuon kini.

Hinoun gihimo lamang kini sa mga survivor kagahapon lamang adlawa aron lamang matubag ang ilang mga pangutana nganong hinay ug kulang ang hinabang ngam iabot kanila.

Nipasalig usab ang grupo nga human sa welga ug maapabot ilang hangyo mobalik ra sila sa ilang tagsa-tagsa ka mga tent ingon man relokasyon.

Misuway og tawag sa buhatan sa DSWD ang Sun.Star SuperBalita apan wala pa silay komento kalabot niini.