3 ka sakyanan nagbangga, 24 angol
-A A +AThursday, July 19, 2012
GIKUMPIRMA ni Police Inspector Erickson Sabanal, hepe sa Police Station 8 (PS8) sa Lumbia, nga mokabat sa 24 ka mga pasahero ang naangol human nabalitok ang usa ka dyip niadtong Miyerkules sa hapon sa Lumbia ning siyudad sa Cagayan de Oro.
Ang Lumbia Liner gimaneho ni Giovanni Larede, residente sa susamang dapit, kinsa nisaysay nga kalit lang nawad-an og preno ang dyip ug bisan unsaon ug tuyok-tuyok sa manibela aron kini mopaingon sa kilid ug dili grabe ang kadaot milahos kini ug nabalitok miresulta sa pagkaangol sa pipila ka mga pasahero.
Nabangga usab ang dyip sa laing dyip nga Xavier Heaghts nga gimaneho ni Arnel Asentista, 34; ug laing 125 XRM motorcycle gimaneho ni Nilo Malate, 59, pulos residente sa Lumbia.
Matud ni Sabanal nga usa ka tinun-an nga giilang si Felipa Cariliman ang naputlan og tulo ka tudlo. Naangol usab ang laing mga tinun-an nga mao sila si Julian Mcwinston, Sharmaine Japon, Harold Masi, Nimrose Suwayan, Monalisa Capa ug Almera Tinabay.
Ang pipila sa mga magtutudlo nga naangol mao sila si Marites Ica, Shiel Bautistas, Emera Enerio, Jodith Boronega ug laing lima ka mga magtutudlo sa Lumbia National High School.
Nasayran nga pauli na ang mga biktima denhi sa siyudad niadtong tungora.
Ang driver detinado karon sa PS8 kinsa gikatakdang mag-atubag sa kasong reckless imprudence resulting to multiple physical injuries.
Gipasalamatan nga luwas ang mga biktima ug pipila nakagawas na sa balay tambalanan sa Jr. Borja Memorial Hospital ug Northern Mindanao Medical Center (NMMC). (SVB)
Gipatik sa mantalaang SuperBalita Cagayan de Oro Hulyo 20, 2012.
Balita
Forum rules: Do not use obscenity. Some words have been banned. Stick to the topic. Do not veer away from the discussion. Be coherent and respectful. Do not shout or use CAPITAL LETTERS!
