Babaye nabanggaan, patay

DEAD on arrival sa balay tambalanan ang 26 anyos nga babaye human nabanggaan og taxi niadtong Miyerkules mga 5:30 sa kadlawon ubos sa Puerto Fly over ning siyudad sa Cagayan de Oro.

Giila ang biktima nga mao si Nida Galope, 26, lumad nga taga Cabanglasan, Bukidnon, kinsa adunay unom ka mga anak.

Si Senior Police Officer 4 Ronilio Ubas, traffic investigator sa Police Station 6 (PS6) sa Puerto nga nahinabi sa Sun.Star SuperBalita, niingon nga gikan ang biktima sa siyudad sa Gingoog niadtong tungora kay nagbisita sa iyang bana nga napriso sa dapit.

Sakay sa bus nagpahunong kini sa Puerto aron manakay na usab og laing bus paingon sa Bukidnon apan sa pagtabok niini kalit lang kining nabanggaan sa usa ka taxi nga gimaneho ni Esterlito G. Maputol, hingkod ang edad, taga Scions, Canitoan ning siyudad.

Nakaangkon ang biktima og bali sa iyang kamot ug tiil nga bahin ug nabunal pa ang ulo niini sa atubangan sa taxi nga maoy posibleng hinungdan sa hinanaling kamatayon niini.

Gani gisuwayan pa sa kapolisan pagdala sa Puerto Sabal Community Hospital apan dead on arrival nga gideklarar sa mga doktor.

Ang driver uban sa taxi nga gimaneho niini ang detinado karon sa PS6 apan matud ni Ubas nga posibleng adunay mahitabo ang nga settlement tali sa paryente sa biktima ug sa taxi driver.

Gikatakdang dalahon sa Bukidnon ang patayng lawas sa biktima human sa panaghusay.