DSWD mipasabot human gi-welgahan

GITUBAG sa Department of Social Welfare Development (DSWD) sa Northern Mindanao ang mga alegasyon sa mokabat 300 ka mga “Sendong” survivor nga nagwelga niadtong niaging adlaw.

Singgit sa mga “Sendong” survivor nga dili patas ang pagpanghatag og hinabang ingon man walay sistema sa mga listahan.

Si Daisy Babiera sa DSWD’s crisis intervention unit sa dayalogo nga nahitabo niadtong Miyerkules sa hapon nga dili gyod nila mahatag ang tanan tungod kay kinahanglan pa silang makig-coordinate sa City Social Welfare and Development (CSWD).

"The concern of DSWD is more on the evacuation centers, while the CSWD took care of those survivors in the communities," pasabot ni Babiera.

Dugang niini nga ang validation ug entry sa family access card sa database nagpadayon labina ubay-ubay pa ang wala naapil niini. Denhi sa siyudad sa Cagayan de Oro, mokabat sa 8,559 shelter units ang gikinahanglan alang sa mga biktima.

Apan kinahanglan pa nga magtukod og 5,357 tungod kay 1,696 pa lamang ang nakumpleto ug 1,080 ang gipubos sa kontruksiyon. Mokabat usab sa 2,577 ang wala pa natukod.

Kahinumduman nga gatusan ka mga “Sendong” survivor denhi sa siyudad ang nagwelga ug nipaabot nga lisod kaayo ilang kahimtang tungod kay ilang nakita nga adunay mas gipaboran sa pag-apod ug hinabang.

Usa sa gi-example niini ang mga balay nga partially damagay daw nahimo kining totally damaged. Gikwestyon usab sa grupo ang hinabang gikan sa nasod kung asa kini napaingon ug gusto sa grupo nga matubag kining ilang mga yangongo.

Matud ni Abhar nga sila angay ang mas prayoridad sa benipisyo labina sila ang nangawad-an sa puloy-anan ug maglisod sila sa pagbangon.

Gusto usab ipaabot sa grupo nga unta makabot kining ilang gihangyo ngadto kang DSWD Secretary Dinky Soliman ug Presidente Benigno Aquino III.

Ilang gibutyag nga ila lamang kining gipaabot tungod kay basin unya ang mga kadagkoan niini sa maong buhatan wala masayod niini. Dugang pa nga imbes unta nga tuwid na daan ang mahiaguman apan wala nibaliko hinuon kini.

Hinuon gihimo lamang kini sa mga survivor kagahapon lamang adlawa aron lamang matubag ang ilang mga pangutana nganong hinay ug kulang ang hinabang nga miabot kanila. (SVB/ACM)