Gipusil, gibundakan og bato

GIPUSIL ug gibundakan pa og bato ang ulo sa usa ka lalaki niadtong Miyerkules mga alas 10:30 sa gabii sa Sitio Taguanao, Barrameda Road, Barangay Indahag, ning siyudad sa Cagayan de Oro.

Dead on the spot si Joseph Haplag, hingkod ang edad, lumad nga taga lungsod sa Balingasag, Misamis Oriental ug kasamtangan nga nagpuyo sa maong dapit.

Si Police Officer 3 Alvin Nacaya sa Police Station 9 (PS9) sa Macasandig niila sa suspetsado sa pagpatay nga mao si Estaneslao Mabaylan, 47, minyo, nagtrabaho isip watchman sa Barrameda Road.

Si Nacaya nga nahinabi sa Sun.Star SuperBalita niingon nga milabay sa dalan niadtong tungora si Haplag nga lango sa ilimnong makahubog kauban ang mga higala niini.

Giingong nagkabikil lang sa estorya tungod sa giingong gisita ni Mabaylan ang biktima nga gidili ang mga hubog sa dapit nga gituohang nalain si Haplag tungod kay iyang nakita nga lango usab og ilimnong makahubog si Mabaylan.

Tungod niini, nagkainit ang estorya ug sa bersyon ni Mabaylan gibutyag niini nga nahadlok siya kay gilibutan siya ug aksyon nga tabangan sa biktima ug kauban niadtong tungora hinungdan nga wala na nakaagwanta ang suspek ug gikuha ang iyang isyu nga 38 kalibre ug gipusil makaupat ka higayon ang biktima.

Daling midagan ang mga kauban niini sa kahadlok usab nga pangpusilon ug gibiyaan ang nagbuy-od ug nagkadugo nga biktima niadtong tungora.

Apan ang suspek niangkon nga mga 15 minutos gikan gipusil ang biktima iya na usab kining gibalikan ug gibundakan og ulo ang bato maoy hinungdan sa hinanaling kamatayon niini.

Miresponde ang kapolisan ug gipangita pa ang suspek nga nagtago niadtong tungora ug tungod sa tabang sa pipila ka residente nasikop ra usab ang suspetsado.

Nasayran nga atol sa insidente gikan nagtambong og lubong si Haplag sa amahan niining namatay ug human sa lubong nag-inom uban sa higala gani nahadlok ang pamilya tungod kay ang usa ka igsuon nagsige og buhi sa pulong nga daw adunay mosunod nga mamatay kanila ug wala nila gidahom nga si Joseph ang mamatay.

Matud ni Nacaya nga andam nga atubangon sa suspetsado ang salaod nga ipahamtang ngadto kaniya.

Ang patayng lawas nagpabilin pa sa Bollozos funeral parlor ning panahona.