8 OFW sa Oro gikan Syria nakauli na

WALO ka mga overseas Filipino workers (OFWs) gikan sa nasod sa Syria ang nakauli na niadtong Sabado dinhi sa siyudad sa Cagayan de Oro.

Gibutyag ni Harry Borres, kinsa Supervising Administrative Officer sa Overseas Workers Welfare Administration (Owwa)-Northern Mindanao, nga luwas sila nga nakauli.

Gibutyag niini nga silang mga OFWs ang apektado sa kagubot sa Syria hinungdan nga mismong ilang mga ginikanan maoy nangayo og tabang nga sila makalingkawas ug makauli na dinhi sa nasod.

Nasayran nga giputol sa maong OFWs ang ilang kontrata sa trabaho sa dapit tungod sa panawagan sa Department of Foreign Affairs (DFA) nga kinahanglan na sila mag-evacuate.

Matud ni Borres nga adunay mga OFWs nga taga Cagayan de Oro gihapon pero wala ni-uli tungod kay layo ra ug dili man kaayo apektado sa kagubot.

Nanawagan usab si Borres niadtong adunay kabanay sa maong nasod nga motaho lang kanila aron magiyahan unsay buhaton aron mapauli kini sa nasod.

Kahinumduman nga pipila na ka bulan ang kagubot sa Syria human daghan ang naninguha nga mahawa sa pwesto ang lider sa maong nasod apan nidumili kinsa pagkanaog sa iyang pwesto.