Amusement rides safety ordinance giaprobahan

ARON masiguro ang seguridad sa mga amusement rides alang sa pagadangaton nga selebrasyon sa fiesta ni patron Saint Augustine, ang konseho sa siyudad niadtong Martes mi-aproba sa ordinansa nga mao ang Amusement Ride Safety Regulation 2012.

Si Konsehal Emmanuel Abejuela niingon nga ang ordinansa naglangkob sa operasyon sa amusement rides, carnivals ug circuses ingon man outdoor concerts, shows, sports, ug laing pang mga kalihokan sa pista.

Kini aron pagsiguro nga luwas ang mga performer sa mga gipanggamit nga mga movable stage o platform, bleachers, canopy, ug mga estraktura.

Mohatag og penalty kung makasupak ug mahitabong adunay mga masamdan, damyos kabtangan ingon man mga wala nag-function nga mga amusement rides nga kasagaran mahitabo sa laing siyudad.

Si Abejuela niingon nga dili nila ibutang sa risgo ang seguridad sa Kagayan-on labina gyud sa mga amusement ride nga misulod na sa kasamtangan dinhi sa siyudad ang carnivals ug laing mga kalihokan alang sa kapistahan.

Ang gitumbok nga mga amusement rides sama sa ferries wheel, octopus ug roller coaster ug sila gihatagan og mga precautionary measures niini.

Ang mga konsehal nagtuo nga kinahanglan mahibaloan ang mechanical soundness sa rides, pasilidad ug mga struktura aron masiguro ang proteksyon sa publiko ug malikay sa mga aksidente.

Ang aprobadong ordinansa naglatid nga walay bisan kinsa nga tao o kompanya nga mag operate og amusement rides kung wala nagkuha og business permit o special permit gikan sa opisina sa Mayor.

Ang safety certificate kinhanglan nga giisyu sa Office of the Building Official human gihimo ang electrical, structural ug mechanical inspection sa maong mga establismento.

Kung ang permit maaprobahan na ang tag-iya gihangyo nga ipilit kini sa entrada sa carnivals ug amusement places.

Giwarningan ang mga tag-iya nga kinahang imintinar ang kalimpyo ug sanitasyon sulod niini ug magpakita og mga rules ug regulasyon ingon man safety precautions sa mga amusement rides labina sa minor de edad nga mag-comply sa ilang maintenance bulletin ug service manual apil na ang mga pahimangno sa mga rides gikan sa manufacturer.

Gihangyo usab sila nga aduna kanunay mga first aid kit, telepono panahon sa emerhensya ug mag-establisar sa mga emergency procedures.

Si Konsehal Abejuela nipasabot nga ang dili motuman sa ordinansa adunay penalty. (SVB/NJM)