Babae kuwang sa pangutok gi-gang rape

USA ka 23 anyos nga dalaga ug gituohang adunay deperensya sa pangutok ang gitabangan og lugos niadtong nilabayng adlaw sa Pinikitan, Camaman-an, ning siyudad sa Cagayan de Oro.

Ang amahan sa biktima niadtong Huwebes sa hapon nagpa-blotter sa Police Station 2 (PS2) sa Cogon tungod kay wala siya nakahibalo kung unsay unang buhaton human mitug-an ang iyang anak kaniya kalabot sa pagpanglugos nga nahitabo niini.

Saysay sa amahan nga anaa lamang siya sa ilang balay niadtong tungora kay gikan man kini na-paralized ug ang asawa niini usa man ka sidewalk vendor sa Cogon ug nanginabuhi usab niadtong tungora.

Milakaw lang kalit ang iyang anak nga taguon na lamang sa ngalan nga Janet gani kanunay kining pahimangnoan sa amahan nga dili gyud molakaw bisan asa kay basin unya madisgrasya.

Apan milakaw ang biktima niadtong tungora ug didto nipaingon sa grupo sa mga lalaki nga nag-inom.

Gitumbok nga mitabang sa paglugos niini ang pipila ka silingan nga driver og motorela ug traysikad kinsa maoy nidala sa biktima sa ngitngit nga bahin sa dapit.

Kahilakon kaayo nga misaysay ang amahan nga daw samtang gilugos ang iyang anak sa mokabat lima ka mga lalaki sa grupo nagtan-aw ug giingong nagsige pa og katawa.

Giingong gipuli-pulihan ang biktima sa maong mga lalaki nga dili pa ikabutyag ang mga pangalan ning panahona.

Natingala ang inahan sa biktima kay wala nakauli ang ilang anak ug mga kadlawon na kining nakabalik sa puloy-anan nga dili na motingog.

Nasayran nga usa ka bulan pa ang nilabay nga gibati deperensya sa pangutok niini kinsa nagsugod na dayon sa paglakaw-lakaw.

Ang amahan gusto makab-ot ang hustisya alang sa anak ug masikop ang mga suspetsado.

Ang mga policewomen sa PS2 nitambag niini nga ipa-medical check-up aron tuloy-tuloy nga mapasakaan og kaso ang mga suspetsado.

Gawas niini, gusto usab sa amahan nga matambalan ang sakit sa iyang anak aron mobalik kini sa normal nga pangisip.