14 anyos nahulog, patay

NAKABSAN sa iyang kinabuhi sulod sa emeregency room sa balay tambalanan ang 14 anyos nga dalagita human nahulog sa pangpang niadtong Lunes didto sa lungsod sa San Fernando, Bukidnon.

Giila ang biktima nga mao si Merrisa Hambas, residente sa susamang dapit kinsa giduso sa Northern Mindanao Medical Center (NMMC) ning syudad sa Cagayan de Oro, human grabe ang naangkon niniing bali sa lain-laing parte sa kalawasan.

Ang amahan sa biktima nakahilak human sa insidente tungod kay nag-uban pa sila sa iyang anaka sa umahan.

Lawom nga pangpang ang ilang naagian niadtong tungora apan wala namatikdan nga nadigyas ang biktima ug nibalitok makapila ka higayon ug mipaingon sa ubos nga bahin diin usa ka batuhon nga dapit ug kasagbutan nga bahin.

Pagkuha sa amahan sa iyang anak sa ubos nga bahin, dili na kini makalihok ug mireklamo sa sobrang kasakit sa iyang kalawasan hinungdan nga gidala sa duol nga balay tambalanan, apan tungod kay kritikal man ang kahimtang niini, giduso sa NMMC ning siyudad.

Pipila ka oras ang nilbay, nakabsan gihapon sa iyang kinabuhi ang biktima tungod sa grabeng naangkon nga bali sa tii ug kamot, naapil pa og kabunal ang ulo sa biktima. (Stephanie V. Berganio)