Nag-jogging nakitang nagkadugo

OSPITAL ang gipadulngan sa usa ka lalaki human nakita nga nagkadugo ug gituohang nabuak ang ulo samtang kini nag-jogging diha sa Rodelsa Circle nga bahin sa Rotunda ning siyudad sa Cagayan de Oro.

Ang driver sa taxi nga Emark Taxi nagdala og plaka KVW kolor puti maoy nakakita sa biktima nga nagbuy-od na nagkadugo ang ulo apan duna pay ginhawa.

Iya kining gihunongan ug gisakay sa iyang taxi ug gihatod sa Northern Mindanao Medical Center (NMMC) apan dili gihapon makuha ang identipikasyon ninii tungod kay wala man lang kini dala nga pitaka o bisan unsang butang nga nagpaila sa biktima.

Gawas sa t-shirt ug jogging pants, walay nay lain gisul-ob ang biktima. Dili usab masuta kung nabanggaan ba ang biktima o gitripan dayon gibunalan og bato tungod kay walay nakakita ug nakahibalo sa insidente.

Niliki ang ulo sa biktima ug daw migawas ang dugo sa ilong ug baba ninii.
Ang biktima talandugon kaayo ang kondisyon ug dili makasulti.

Ang security guard sa emergency room nanawagan na lamang ngadto sa paryente sa biktima nga susihon kini ug bisitahon labina gikinahanglan pag-ayo sa mg doktor ug nurse ang presesnya sa watcher nga moabag sa panginahanglan niini. (SVB)