Opisyal nanagpa?

NAGPATABANG sa kapolisan ang inahan sa adunay deperensya pandungog nga bata human giingong gisagpa makatulo ka higayon ang iyang anak ug giingong gitionan pa og pistola niadtong Lunes sa gabii sa Macabalan ning siyudad sa Cagayan de Oro.

Saysay sa inahan nga mao si Marilyn (bansagon gipugngan), taga Acreation, Macabalan, nga nagtindog-tindog ang iyang 8 anyos nga anak nga mao si Kenneth niadtong tungora daplin sa kalsada apan tungod kay aduna man kini deperensya sa iyang pandungog, daw wala niini nabantayan nga gisirbatuhan na diay kini sa sakyanan.

Ang maong sakyanan giingong gipanag-iyahan daw sa usa ka Chief Inspector Bacaraman, residente gihapon sa dapit ug giingong nadestino sa Police Regional Office diha sa Camp-Alagar.

Giingong gikanaogan sa maong polis ang bata ug gisagpa makatulo ka higayon, ug wala pa nakuntento giti-onan og pusil ang ulo resulta sa sobrang kalisang ug kahadlok sa biktima.

Tungod niini, nagpatabang gyod dayon ang biktima sa Police Station 5 (PS5) sa Macabalan.

Si Police Officer 1 Trisy Marie Kim sa PS5 nibutyag sa Sun.Star SuperBalita nga wala nakaila sa pangalan ang inahan ug sukad sa pagpablotter niini niadtong Lunes sa gabii wala pa kini makabalik sa ilang buhatan.

Dugang ni Kim nga ila kining imbestigahan labina usa kini ka kaso sa child abuse.

Samtang nasuta nga walay chief inspector nga nadestino sa Camp Alagar apan usa lamang ka police superintendent nga susama niini og apelyido, apan padayon pa nga gisuta kung mao ba kini ang nihimo sa maong bata.

Giingong ang maong opisyal daw anaa pa sa Bukidnon ning panahona.