Lungon gi-anod

TUNGOD sa pagsaka sa tubig, gi-anod ang lungon nga dunay sulod nga patay’ng lawas sa Sagay, probinsya sa Camiguin niadtong Huwebes.

Maayo na lamang dali ra dayon kini’ng nakuha sa iya’ng mga paryente og gidala sa taas nga bahin nga dili na ma-abot sa tubig baha.

Giingong tulo ka mga lungsod sa probinsya sa Camiguin ang gibaha tungod sa walay hunong nga pag-ulan sugod niadtong huwebes sa gabii paingon sa Biyernes sa gabii.

Ang tulo ka mga lungsod mao ang lungsod sa Sagay, Mambajao, og Mahinog. Sa Mahinog, dul-an 250 ka pamilya ang gipangbakwit.

Pipila sa mga residente sa dapit ang namakwit tungod kay mi-alerto kanila ang tinungyanan sa Camiguin Disaster Council nga dili na hulaton nga mosaka pa ang tubig og kinahanglan nga magbantay.

Hinuon luwas og na-rescue ra ang lima ka tawo nga giingong gianod sa baha og luwas na sa makuyaw’ng kahimtang.

Nanawagan usab ang kagamhanan sa Camiguin niadtong mga turista nga dili nalang sa ipadayon ang ilang pagsuroy sa dapit aron makalikay sa insidente.

Ang walay hunong nga pag-ulan gumikan sa low pressure area (LPA), basi sa satellite ug surface data sa 450 kilometro gikan sa Eastern Samar.

Ang duha ka mga LPA nagdala og nagkalain-laing ulan sa dapit og apektado ang Northern Mindanao nga posibleng makahinungdan sa landlides og pagbaha.

Ang siyudad og Misamis Oriental alerto gihapon niining panahona labi na nga ang gibantayan nga LPA posibleng mahimong Bagyong Gener. (Stephanie V. Berganio)