Sundalo gi-torture?

MOKABAT sa 30 ka mga pinusilan sa lain-laing parte sa lawas ang naangkon sa sundalo, basi sa resulta sa eksaminasyon nga gipahigayon sa mga sakop sa Scene of Crime Operatives (Soco) sa morgue sa Greenhills funeral parlor sa Bulua, ning siyudad sa Cagayan de Oro.

Gipusil og giluba ang biktima basi sa resulta sa pagsusi sa Soco.

Nakumpirma nga bukog ni Staff Sergeant Wilton Pairat ang gisusi sa Soco nga giingong nakuha bugti ang P30 mil nga bayad sa midagit niining mga pipila ka sakop sa New People's Army (NPA) didto sa lungsod sa Kitaotao, Bukidnon.

Nasayran nga dul-an usa ka tuig na nga nawala ang biktima.

Ang pagsusi sa patay’ng lawas giulohan ni Police Senior Inspector Neilsedaca Villanueva sa Soco.

Duna usab nakita nga binunalan og gahi nga butang sa ulo, og duha ka mga dinunggaban ang biktima.

Gibutyag sa mga sakop sa 4ID nga nagpositibo ang patay’ng lawas nga mao si Pairat gumikan sa sinina nga gisul-ob niya niadtong 2011, tuig gikan gidagit ang biktima. Grabe ang pangita sa mga pamilya niini og ning bulan lamang sa Hulyo nahibaloan nga gilubong na kini og gipatay na.

Gihimo ang negosasyon human naninguha ang pamilya nga unta mahibalik lang ang lawas sa nawala nilang kabanay og haligi sa pamilya.

Tuod man misugot ang giingong mga NPA apan daw bugti niini ang P30 mil nga kantidaad.

Atol sa eksamin sa patay’ng lawas, nasuta nga gawas sa 30 ka samad pinusilan, makita osab nga gibunalan pa ang ulo niini og aduna kini duha ka mga dinunggaban sa lawas.

Gihulagway sa mga kadagkoan sa 4ID nga dili tiaw ang kamatayon sa biktima ug posibleng gitorture kini pag-ayo.