2 patay sa bangga

DUHA ang patay sa nagkalain-laing kaso sa bangga nga natigayon denhi sa siyudad sa Cagayan de Oro ug lungsod sa Villanueva, Misamis Oriental.

Walay identipikasyon sa unang biktima nga dead on arrival sa Northern Mindanao Medical Center (NMMC).

Nasayran nga duha ka motorsiklo ang nagsungag diin biktima paingon sa Barangay San Martin lungsod sa Villanueva ug ang katabo niini paingon unta sa dalan sa lungsod sa Claveria kagahapon mga alas 12:30 sa kadlawon sa lungsod sa Villanueva, Misamis Oriental.

Apan tungod sa kusog sa impact sa pagkabangga, nabunal ang ulo sa biktima ug nilagpot tunga sa kalsada.

Walay identipikasyon sa usa ka driver nga gibana-banang nag-edad og 20 pataas, dili mahitsura ang kadaot sa nawong sa biktima nga daling gidala sa NMMC ug gideklarar nga patay na dihang gihidangat.

Ang usa ka driver sa motorsiklo ang nakaangkon og bun-og ug pangos sa lawas nga giilang si Jhon Alban Jr. ang padayon pang giatiman sa mga doctor sa NMMC.

Sa pagsulat ning balita, ang patayng lawas anaa pa sa morgue human wala pay ni-claim niini.

Laing dead on arrival sa NMMC ang usa ka lalaki nga biktima gihapon sa bangga diha sa Barangay Cugman ning siyudad mga alas 12:30 kagahapon sa kadlawon.

Giila ang biktima nga mao si Jun P. Cataylo, 38, minyo, taga Canitoan ning siyudad.

Nasayran nga pauli na unta ang biktima niadtong tungora dihang nasungag niini ang usa ka Toyota van- Hi-Ace gimaneho ni Nilo C. Rosales, 50, taga Camaman-an ning siyudad kinsa detinado karon sa prisuhan sa Police Station (PS10) sa Cugman.

Gibutyag sa driver nga kusog kayo og padagan ang motorsiklo hinungdan wala gyod nakalikay niini ug posibleng wala sab siya nabantayan sa biktima.

Dili tiaw ang naangkon nga bali sa tiil ug likod sa biktima ug nabunal pa ang ulo. Giusawayan pa kini og tabang sa mga doctor sulod sa emergency room apan nakabsan gyod sa iyang kinabuhi.

Kasong reckless imprudence resulting to homicide ang gikatakdang ipasaka batok sa suspek.