4 sapon sa buy-bust

LAING kalampusan sa Philippine Drug Enforcement Agency (PDEA) sa Northern Mindanao human usa ka tawo ang nasikop nga gituohang notadong dealer sa illegal nga druga ug laing tulo ka kauban niini niadtong Biyernes alas 11:30 sa gabii sa usa ka suites sa Yacapin Street, ning siyudad sa Cagayan de Oro.

Arestado si Johary A. Mangakoy, 26, nagpuyo sa Mabasa Compound, Karinogan Barangay Balulang, ning siyudad ug uyab niining si Johana N. Cabillo, 19, kauban usab ang inahan nga si Ziselle, 42, pulos residente sa Zone 8, Barangay Cugman, apil sa nasikop ang bellboy sa maong suites nga giilang si Daryl M. Sarsaba, 19, lumad nga taga Tambakan, siyudad sa Iligan.

Si Mangakoy ang giingong taod-taod na nga gisunod sa mga sakop sa PDEA ug usa ka target-listed personality sa siyudad.

Atol sa operasyon, adunay dala nga granada si Mangakoy nga gisuwayan pa niini og tangtang ang safety pin aron ilabay sa mga agent apan nagduha-duha usab kini tungod kay posibleng daghan ang maangin ug nabawian dayon kini sa mga PDEA agents.

Si Mangakoy nihimakak nga dili iyaha ang granada ug baylo lamang kini og shabu.

Giangkon niini nga usa ka tuig na siya nga gapamaligya ug magamitan og shabu ug usa ang maong suites nga kanunay siya magcheck-in.

Nagbasol usab kini tungod kay kanhi iyang trabaho maghimo man ug kwintas nga butangan dayon ug pangalan diha sa kadalanan apan iyang gibyaan human misulod sa bisyo ug illegal nga pagpamaligya labina kay daw sayon lang ang kwarta nga moabot.

Si Sarsaba usab hugot kaayong mihimakak sa iyang kalambigitan tungod kay daw usa lamang siya ka bellboy ug giangkon niini nga gadawatan og tip gikan kang Mangacoy ug sa mag-inahan apan nihimikak sa iyang kalambigitan sa droga.

“Mangayawat ra ko sa tip gikan nila kay ako man gud nagpaskwela sa akong college nga igsuon, pero wala gyod ko kabalo unsa diay ilang negosyo,” matud ni Sarsaba.

Nakuha gikan sa posisyon ang medium sachet sa gituohang shabu, laing sudlanan nga adunay sulod dayon sa marijuana, 2 ka gramo sa gituohang shabu nga mobalor og P30 mil ug P500 nga marked money.

Ang upat detinado karon sa prisuhan sa PDEA-Northern Mindanao diin kasong supak sa Republic Act 9165, Comprehensive Dangerous Drugs Act of 2002, ug illegal possession of explosive ang gikatakdang isang-at batok ni Mangacoy. (SVB)