Nanggakos og babaye, gipriso

NAGTINGKAGOL sa mabugnaw nga prisuhan ang 35 anyos nga lalaki human giingong nanggakos og misuway og lugos sa 16 anyos nga dalagita kagahapon mga alas 1:00 sa kadlawon diha sa bakanteng luna sa Gaerlan St., ning siyudad sa Cagayan de Oro.

Giila ang suspetsado nga mao si Wilson Binarao, ulitawo, taga Gusa, ning siyudad kinsa apektado kaayo og ilimnong makahubog niadtong tungora.

Saysay sa 16 anyos nga dalagita nga tagoan na lamang sa ngalan nga Rose, taga Capistrano St., ning siyudad nga igo lang siya nangihi unta niadtong tungora apan wala niya namatikdan nga gisunod na diay siya sa suspek.

Saktong pagkahuman niya og pangihi deretso dayon siya nga gigakos sa suspek og daw dali nga mihubo sa iyang shortpants. Gihinol pa ang iyang pribado nga parte sa lawas og samtang siya mosiyagit, sige usab nga tabunan sa suspek ang iyang baba aron walay makadungog kaniya.

Gisuwayan siya og lugos sa suspek apan usa ka mamaligyaay ang nakadungog sa siyagit sa biktima hinungdan nga nangayo kini og tabang sa mga tambay mao nga giayo og sukmag ang suspek.

Naka-brief lang ang suspek nga gidala sa presintuhan sa Police Station 1 (PS1) sa Agora ug gibalhin ra usab dayon sa Maharlika Detention Cell.

Ang suspek dihang nahuwasan na sa ilimnong makahubog hugot nga mihimakak sa pasangil kaniya. Giangkon niining igo lamang niyang gigakos ang biktima. Apan biktima desidido nga pasakaan og kaso ang suspetsado.