68 ka babaye nasikop

MOKABAT na sa 68 ka mga babaye ang nangasikop sa gihimong peace and order drive sa Police Station 1 (PS1) sa Divisoria.

Si Police Superintendent Danildo Tumanda niingon sa interbyu sa Sun.Star SuperBalita nga kini sulod lamang sa bulan sa Hulyo ug kahagapon o karong adlawa gikatakdang mohimo na usab og operation sa pagpangsikop sa area sa Abellanosa St., Gomez, Cruz Taal ug uban pa. Ang maong mga babaye ang giingong namaligya sa ilang kaugalingon nga unod.

Matud ni Tumanda nga 12 niining 68 ka mga babaye ang mga minor nga nag-edad pa og 14 ngadto sa 16 anyos.

Usa sa rason nganong gisikop sila tungod aron makuhaan og kumpletong inpormasyon kini aron kung adunay mahitabong krimen sayon lamang silang maila.

Dili lamang dayag apan gibutyag ni Tumanda nga pipila na ka mga babaye ang gibun-og ug gipasakitan sa ilang mga kostumer ug kung aduna silay mga identipikasyon sayon lang sila nga makapatabang sa kapolisan.

Gawas niini sayon lamang usab nga ma-trace ang maong mga babae kung nihimo sa pagpangawat labina daghan usab ang mga kostumer nga gakawatan niining mga babaye.

Gani niadtong nilabayng semana, usa ka polis nga naka brief lang ang nagpatabang sa PS1 ug niasoy nga tanan niyang gamit, pitaka, kwarta, pistola, karsones ang gikawat sa iyang na partner nga babae. Laing tigulang usab ang mitaho kay iyang cellphone gikawat sa partner ug tungod kay aduna naman mga profile ang maong mga babae sa ilang buhatan sayon ra kini nga na trace ug nasikop.

Gi-require usab ang maong mga babaye nga magpacheck-up kanunay sa City Health likay sa mga sakit nga posibleng motapot kanila sama sa HIV-AIDS.

Matud ni Tumanda nga bisan sa ilang paningkamot nga mahunong kining matang sa ilang panginabuhian mosupak gihapon kining mga babaye labina mao lamang kini ang tinguhaan sa ilang adlaw-adlaw nga panginahanglan ug maoy ilang panginabuhi.

Dugang ni Tumanda nga gibana-banang moabot pa sa 100 kapin ka mga susamang klase sa mga babaye nga gihimo og panginabuhi ang prostitusyon sa ilang area hinungdan walay hunong ang ilang operasyon sa pagpangsikop kanila.

Suportado

Pipila sa mga nalambigit sa prostitusyon ang suportado sa ilang kaugalingon nga mga bana. Gani ang bana pa mismo ang nangita og kostumer aron maoy mogamit sa ilang mga asawa.

Matud ni Police Superintendent Tumanda nga pipila sa mga bana nga ilang nahinabi niingon nga supportive sila sa ilang asawa tungod kay makadugang man kini og income kanila labina gikinahanglan ang kwarta tungod sa kalisod.

Samtang pipila usab giingong tripping lang ang maong trabaho ug naagni lamang sa ilang mga kaila nga susama niini ang panginabuhi.

"Grabe gyod ilang panginabuhi, makita nimo kung unsa kalisod kay kini man gyod ang saligan nga makakwrta sila" matud ni Tumanda.

Nanawagan si Tumanda sa mga grupo sa kababayen-an sa siyudad nga unta matabangan kining maong mga babaye nga mahunong kining matang sa ilang panginabuhi.