Lalaki giihaw sa duha ka magsuon

PATAY ang usa ka lalaki human gitabangan og luba sa duha ka managsuon niadtong Sabado mga alas 12 sa kadlawon sa Upper Ramonal, ning siyudad sa Cagayan de Oro.

Nagtaroy ang kabilya ug kutsilyo sa lawas sa biktima nga mao si Eduardo M. Pahanay, 43, minyo, sa susamang dapit.

Gitumbok nga mga suspetsado giilang si Jay-are Doretso ug Lency Doretso, pulos hingkod ang edad, residente sa susamang dapit.

Saysay sa asawa sa biktima nga gikan nag-inom ang iyang bana ug pauli na unta niadtong tungora dihang nakahapit sa iyang mga silingan.

Kalit lang nga nabikil sa duha ka magsuon nga misangpot sa init nga panaglalis. Ang maong panaglalis midako nga miabot sa punto sa pagpangluba.

Giingong kalit lang gitabangan sa maong magsuon ang biktima og luba gamit ang kabilya ug kutsilyo.

Maayo na lamang gitabang ug aparta sa mga silingan hinungdan nga nabulag ug maoy nakitang naligo sa kaugalingon nga dugo ang biktima nga nagbuy-od, nagtaroy pa sa iyang liog ang kutsilyo samtang nitaroy sa iyang dughan ang kabilya.

Si Police Officer 3 Rabbi Pancit sa Police Station 2 (PS2) sa Cogon nga nahinabi sa Sun.Star SuperBalita niingong nga tibuok adlaw sa Sabado ilang gihimo ang operasyon pagpangita sa mga suspetsado, apan pakyas sila.

"Giimbitahan nato ilang pamilya sa atong buhatan pero wala silay kasayuran asa ang mga suspek," dugang ni Pancit.

Sa pagsulat ning balita, padayon pa ang operasyon pagpangita sa suspetsado.