5 suspek pagpatay, tiklo

NASIKOP sa mga operatiba sa Police Station 8 (PS8) sa Lumbia ang gituohang mga suspek sa pagpatay sa usa ka lolo niadtong Sabado sa gabii sa Barangay Dansolihon, ning siyudad sa Cagayan de Oro.

Si Senior Police Officer 4 Edilberto Carillo, deputy station commander sa PS8 nga nahinabi sa Sun.Star SuperBalita, niingon nga ilang gidakop ang lima nga mao sila si Reynante Labaon, Tony Labaon, Giovanni Labaon, Peril Labaon og Reynaldo Salilo, pulos hingkod ang edad human maoy kauban og inom niadtong tungora sa biktima nga mao si Roberto Loloy, 60, taga Barangay Tignapoloan.

Dugang ni Carillo nga igo lang nga mibisita si Loloy sa iyang anak sa Dansolihon, og nakakita og kainom.

Mao na lamang nahibaw-an pipila ka oras gikan pag-inom niini nga nagbuy-od na ang biktima sa dalan og nagkadugo ang ulo nga gituohang gibundakan og bato.

Wala na makita ang mga suspek nga maoy gitudlong kainom sa mga biktima apan sa tabang sa barangay tanod sa dapit nasapon ang mga suspetsado ug gibalhog sa presinto sa PS8.

Apan si Reynante nga nainterbyu sa usa ka sibyaan sa radyo niangkon nga siya maoy nibundak og bato ni Loloy apan dili unta intensyon nga patyon kini.

"Mangayo gyod ko og pasaylo sa iyang pamilya kay wala gyod nako gituyo, naulit lang man gud ko kay iya kung gisumbag og sakit kaayo," matud ni Reynante.

Sa iyang pahayag ni Reynante, gisaysay nga walay labot ang upat nga nasikop sa krimen tungod kay human sa pag-inom nanguli na kini niadtong tungora og sila na lamang duha ni Loloy ang nahibilin og nagkabikil nga nisangpot sa pagsukmagay.

Gisaysay ni Reynante nga nagkuha siya og bato og iyang gibundakan ang ulo niini apan gitataw nga dili intensyon nga patyon.

Matud ni Carillo nga kung mapamatud-an nga si Reynante maoy nihimo sa krimen posibleng makagawas sa prisuhan ang laing upat ka suspek apan magdepende lamang sa mga pamahayag sa mga saksi.

Sa pagsulat ning balita, gihaya na sa puloy-anan niini sa Tignapoloan ang biktima samtang lima ka s uspek nagtingkagol sa prisuhan. Kasong murder ang gikatakdang ipasaka batok kanila kagahapong adlawa.