Mga sakop sa RTA gibaharan

NAGBAHAD si Cagayan de Oro City Mayor Vicente Emano ngadto sa tanang sakop sa Road and Traffic Administration (RTA) ning siyudad nga silotan kung dili motuman sa ilang mga trabaho dinhi sa siyudad.

Si Mayor Emano nagbahad kanila kagahapon atol sa flag-raising ceremony diin ubay-ubay ka mga empliyado ang nakasaksi.

Bisan ang hungihong nga seksyon sa Sun.Star SuperBalita kanunay nga magpadungog-dungog niining pipila ka mga sakop sa RTA diha sa kadalanan nga magpadaplin og dili motuman sa ilang trabaho. Lakip na niini ang giingong pagpangilkil, pagpasilong, og pagpabugnaw sulod sa establismento.

Apan wala gipalabay ni Emano ang mga nadawat nga reklamo sa katawhan. Gigisa ni Emao ang pipila ka mga sakop sa RTA nga mohimo sa ilang trabaho og dili ang magsige og pahulay.

Dugang niini nga responsiblidad sa maong ahensya nga maubsan og mahapsay ang dagan sa trapiko aron pag-abag sa mga motorista og dili kini pasagdan.

Nagbahad kini nga kung masinupakon sila sa ilang mga buluhaton iya kining silotan susama sa pipila ka empliyado sa City Hall nga gisuspenso og walay madawat nga sweldo.

"Diha kamo sa dalan sa siyudad og magtrabaho mo kay ang katawhan maoy magsweldo kaninyo. Dili tungod kay duol na ang politika, masayon sayon ko ninyo pero kung unsay trabaho nga gihatag kaninyo buhata," mando sa mayor.

Gibitikan usab sa mayor ang giingong pipila ka mga sakop sa RTA nga mangdakop og mga dagkong truck sa National Highway.

Gipasabot kanila nga dili nila trabaho ang pagpangdakop sa mga dagko nga trak diha sa National Highway og gi-note pa niining gihimo lang kini aron mangilkil lang. Mibahad ang mayor nga dili kini himuon tungod kay ang RTA gitahasan lamang sa siyudad moalerto aron magpahapsay og magpitol usab sa mga badlungong driver og dili ang mangilkil. (Stephanie V. Berganio)