Bana gipusil, kritikal

TALANDUGON ang kahimtang sa usa ka lalaki human gipusil kagahapon mga alas 12:45 sa kadlawon sa Barra, lungsod sa Opol, Misamis Oriental.

Giila ang biktima nga mao si Marlon Ladasco, 39, taga Zone-4, Iponan, ning siyudad sa Cagayan de Oro.

Ang asawa sa biktima nisaysay nga sa wala pa nahitabo ang pagpamusil, nananghid kaniya ang iyang bana nga molakaw usa kay adunay importante nga lakwon sa Barra.

Naabtan og pila ka oras nga hinulat ang asawa ug mao na lamang iyang nadawat nga report nga gipusil na ang iyang bana.

Nasayran nga samtang sakay ang biktima sa iyang motorsiklo, kalit lang kining gibabagan sa laing motorsiklo ug gipusil.

Usa ka alyas Bryan ang gitumbok nga suspetsado sa pagpamusil. Naigo ang dalunggon sa biktima ug mipilit pa ang bala sa apapangig niini dihang gidala sa Northern Mindanao Medical Center (NMMC) ning siyudad.

Ang kapolisan sa Opol Police Station padayon sa pagsuta kung unsa ang kalambigitan sa biktima nganong gipusil kini.

Gipangita usab sa kapolisan ang suspetsado kinsa misibat human sa pagpamusil.

Kritikal ang biktima nga anaa pa nagpabilin karon sulod sa emergency room sa NMMC. (SVB)