Lolo nabanggaan, patay

NAKABSAN sa iyang kinabuhi ang usa ka lolo human nabanggaan og motorsiklo niadtong Lunes mga alas 5 sa hapon sa purok 6, Barangay Tagbocboc, lungsod sa Talisayan, Misamis Oriental.

Giila ang biktima nga mao si Rufino Dorador, 78, minyo, sa susamang dapit.

Asoy sa anak sa biktima nga maoy nagdala niini sa Northern Mindanao Medical Center (NMMC) ning siyudad sa Cagayan de Oro nga mitabok ang iyang amahan aron unta nga mopalit og ice kay nireklamo kini tungod sa kainit sa panahon.

Apan wala namatikdan sa biktima ingon man mismo sa driver sa motorsiklo ang presesnya niini hinungdan nga maayong pagkabangga niini.

Tungod sa kusog nga dagan, kusog usab ang impak sa pagkabangga ug maayong pagkabunal sa ulo sa biktima ug pagkapangos ug pagkabun-og sa lain laing parte sa kalawasan niini.

Gidala ang biktima og dali sa Talisayan District hospital, apan giduso sa NMMC ning siyudad tungod sa talandugon nga kahimtang niini.

Mga alas 9 sa gabii nahidangat sa NMMC ang biktima ug gitabang pa sa mga doktor apan mga alas 11:30 sa gabii nakabsan gyod sa iyang kinabuhi ang biktima.

Daw ang driver sa motorsiklo boluntaryong mitahan sa Talisayan Police Station ug mitabang sa mga galastuhon sa biktima.