3 ka tulis sulod sa 24 oras

TULO ka mga pagpanulis ang nahitabo ning dakbayan sa Cagayan de Oro sulod lamang sa 24 oras.

Unang gitulis mga alas 6:30 sa gabii niadtong adlaw’ng Martes ang usa ka laundry shop nga nahimutang sa Barangay Nazareth ning siyudad sa Cagayan de Oro diin duha ka mga suspetsado ang nitulis sa kahera.

Apan tungod kay anaa sa likod niadto’ng tungora ang laing trabahante nga nakamatikod sa presensya sa mga tulisan, gitawagan ang Police Station 9 (PS9) sa Macasandig nga deretsong nakaresponde sa hitabo human usab kamulo og roving niadtong tungora nga miresulta sa pagkasikop sa duha ka mga suspetsadong tulisan nga mao sila si Jethro Ellevera og Gabriel Villarin, pulos hingkod ang edad og residente sa Baranagay Patag ning siyudad.

Gibalhog sa prisuhan ang duha ka mga suspek kinsa hugot nga mihimakak sa pagpanulis.

Mga alas 7 sa gabii gitulis na usab ang lain nga tindahan nga gipanag-iya sa usa ka ginganlan nga Elsa.

Nagpatuo’ng kostumer ang mga tulisan sa gamay’ng tindahan sa Barangay Tablon mga alas 7 sa gabii ning siyudad og mideklarar og tulis apan P30 pesos lamang ang nakuha sa mga tulisan human misiyagit ang tindera.

Kagahapon usab mga alas 2:30 sa kadlawon gitulis ang Phoenix Gasoline Station sa Baranagay Puerto.

Unang nagpatuo’ng magpatubil ang tulo ka mga suspek nga sakay og motorsiklo nga XRM. Apan nakurat pag-ayo ang gasoline boy dihang kalit lang siya nga gitionan apil ang sekyu niadtong tungora sa kalibre 38 hinungdan nga kini dili makalihok.

Matud ni Police Officer 2 Patrick Baylin sa Police Station 6 (PS6) sa Puerto nga nakuha sa mga tulisan ang halin niadtong tungora nga mobalor og P3,200 og daling misibat human sa panghitabo.

Nakatabang ang paghatag og deskripsyon sa mga biktima sa pag-ila sa mga suspetsado kinsa giingo’ng notado nga suspek sa mga tulis sa lugar og gipangita na karon.

Kahinumduman nga niadtong niaging semana giingo’ng gitulis usab ang usa ka parmasya sa Barangay Kauswagan.

Si Cagayan de Oro City Police Director Gerardo Rosales namahayag nga dili alarming ang maong pagpanulis tungod kay dili mga dagko nga kantidad ang nakuha og napugngan ang pipila ka mga tulisan.

Giklaro ni Rosales nga luag kaayo ang siyudad og dili maapod sa kapolisan sa pagbantay mao nga hugot kini nangayo og suporta sa katawhan nga kung mahimo itawag gyod dayon kanila.

Gipasabot usab niini nga ilang gihimo ang mga preventive measures og walay hunong nga tambag sa mga establismento aron mokooperar kanila.