2 gikuotan sa merkado

IGO na lamang sa pagpatabang sa kapolisan ang duha ka mga babaye human gikuotan sa managlahing insidente niadtong Miyerkules, Agosto 9, sulod sa merkado sa Cogon.

Unang mitaho sa Police Station 2 (PS2) sa Cogon si Maribel Camomot, 43, minyo, taga Puntod ning siyudad human nadiskubre nga wala na ang iyang pitaka nga aduna pay kwarta’ng nahibilin nga nagkantidad og P500.

Mga alas 7:30 sa gabii adlaw’ng Miyerkules niadto ang biktima sa merkado kay adunay paliton apan nakurat pag-ayo ang biktima tungod kay imbes mopalit og bugas wala na ang iyang pitaka sa iyang bulsa.

Gamay lang kini nga pitaka apan daghan sulod resibo og uban pa nga importanteng dokumento. Gani nagtuo ang biktima nga nahulog kini apan uwahi na dihang miingon ang tindero nga aduna siyay namatikdan nga nagsige og sikit sa biktima. Igo na lamang sa pagpatabang sa PS2 ang biktima human nagtuo kining gikuot iyang pitaka.

Samtang laing babaye usab ang gikuotan nga mao si Stella Rabanes, 35, minyo, taga Camaman-an ning siyudad.

Gisaysay niini nga sayo siya nangmerkado tungod kay magluto man siya og sud-an og pauli na unta niadtong tungora sakay na sa motorela.

Tungod kay naandan man niini nga mokuha og pamasahe mao na lamang iyang nadiskubre nga wala na iyang pitaka. Gibana-bana niining mokabat sa P1,000 ang nahibilin pa sa iyang pitaka og maayo na lamang nakapangopra na kini.

Mikanaog kini og nagpa-blotter sa PS2 sa Cogon. Dako ang pagtuo sa kapolisan nga suspek anaa lamang naglibot diha sulod sa merkado. (Stephanie V. Berganio)