Amahan gitigbas sa anak

NILANDING sa balay tambalanan ang usa ka lalaki human gitigbas sa iyang anak kagahapon mga alas 4 sa kadlawon sa Upper Bulua ning siyudad sa Cagayan de Oro.

Giila ang biktima nga mao si Roy Satur, 54, balo, residente sa susamang dapit kinsa nakaangkon og samad sa iyang ulo, likod og tiil nga bahin.

Gitumbok nga suspeko ang anak niining si Ruel, 23, minyo, sa susamang dapit.

Gisaysay sa paryente sa biktima nga maoy nidala niini sa Northern Mindanao Medical Center (NMMC) nga milayas si Ruel uban sa iyang asawa og duha ka mga anak human sa insidente.

Kwestyonable usab kaayo kanila unsa ang nahitabo nganong nahimo ni Ruel ang pagpanigbas sa iyang kaugalingong amahan.

Matud sa paryente nga mao lamang ilang nadungog nga nagsige og siyagit si Ruel sa iyang amahan og namulong nga "nagsalig ko nimo, nganong gihimo ni nimo, wala kay batasan" apan dili dayag kanila kung unsay kinatibuk-an nga hitabo.

Ang biktima luwas na karon sa makuyaw’ng kahimtang sulod sa emergency room.

Dihang gipangutana ang biktima pasakaan ba og kaso ang anak daw motubag lamang kini nga dili pa igo ang gihimo sa iyang anak nga pagpanigbas aron makabalos siya sa iyang gihimo niini. (Stephanie V. Berganio)