CDO kulang ug dugo tungod sa dengue

GIANGKON sa chairman sa health and sanitation nga adunay shortage sa dugo tungod sa “alarming” nga kaso sa dengue ning siyudad sa Cagayan de Oro.

Si Konsehal Dante Pajo nibutyag nga gikinahanglan kaayo ang Type A og Type AB nga dugo kay hurot-hurot na kini sa blood bank tungod sa pagsaka sa kaso sa dengue.

Gibutyag niini nga nanawagan siya sa katawhan nga makigtambayayong nga mapugngan ang pagkuyanap sa dengue og mudonar og dugo labina nga gikinahanglan kaayo kini sa Red Cross.

Matud ni Pajo nga moabot sa lima ngadto sa pito ka mga natakbuyan og sakit nga dengue ang na-confine matag adlaw sa nagkalain-laing ospital sa siyudad og sugod sa bulan sa Enero adunay unom ka mga bata ang nakabsan sa kinabuhi tungod sa dengue. Sa bulan sa Hulyo, adunay natala nga tulo ka kaso. Kining pagsaka sa kaso sa sakit midoble kon itandi sa niaging tuig og giawhag niining dili kini ibalewala.

Gani usa ka source diha sa publikong tambalanan sa siyudad ang nibutyag nga niadtong adlaw’ng Lunes miabot sa 70 ka mga bata nga nag-edad og 2 anyos ngadto sa 16 anyos ang anaa sa pediatrics ward tungod sa kaso sa dengue. Hinuon luwas na sa makuyaw’ng kahimtang, samtang wala pay labot niini ang mga hamtong og edad nga biktima usab sa maong sakit.

Ang natala gikan sa surveillance team sa City Health Office nga gipangulohan ni Dr. Joey Retuya moabot na sa 1,341 ka kaso ang gikan sa bulan sa Enero hangtod sa unang semana sa Agusto ning tuig kon itandi sa tuig 2011 nga adunay 816 diin 20 ka pasyente ang namatay niini.

Ang lugar nga hotspot sa dengue mao ang mga Barangay Kauswagan, Carmen, Patag, Bulua, ug Consolacion sa Cagayan de Oro human diha ang mga taas nga natala sa mga biktima.

Si Dr. David Mendoza, chief sa Regional Epidemiology, Surveillance and Disaster Response Unit (Resdru) niingon nga adunay 2,456 ka kaso sa Northern Mindanao nga natala sugod sa bulan sa Enero. (Stephanie V. Berganio/Abigail Malalis)CDO kulang ug dugo tungod sa dengue