Mga helmets gisusi

UBAY-UBAY ang nagpila ka mga nanag-iya og motorsiklo dala ang klase-klaseng helmet atubangan sa buhatan sa Department of Trade and Industry (DTI) aron magkuha og ICC sticker (Import commodity clearance).

Kini human gikatakdang ipatuman na ang Republic Act No. 10054, kon "An Act Mandating All Motorcycle Riders to Wear Standard Protective Motorcycle Helmets while Driving."

Pipila sa mga driver niingon nga hasol gyod kini labina adunay mga trabaho, apan kinahanglan nga makakuha og sticker aron dili usab makalapas sa balaod.

Gani pipila ka mga driver mireklamo nga nganong wala nay daan tatak nga ICC samtang ila kining gipalit sa tindahan. Apan nipasabot ang DTI nga wala gitatakan sa mga mamaligyaay nga unta naa naman kini sa pag-import pa lamang.

Tungod niini, ang DTI-Northern Mindanao padayon pa sa pagdawat og aplikasyon aron mag-inspeksyon sa mga helmet nga mabutangan og ICC sticker nga ipulot atubangan sa helmets ug kini nagbase sa coding scheme o last digit sa motorcycle plates sugod niadtong Agusto 6.

Gipanawagan sa DTI nga ang motorsiklo nga adunay plate number nga motapos og 1 ug 2 kinahanglan magproseso matag Lunes, 3 ug 4 matag Martes, 5 ug 6, matag Miyerkules, 7 ug 8 matag Huwebes ug 9 ug 0 sa Biyernes.

Giklaro sa DTI-Northern Mindanao nga ang pagkuha sa porma ug ICC sticker ang walay bayad. Ang mga nanagiya og motrsiko ug helmets mahimong mobisita sa doul nga opisina sa DTI aron magsumiter sa ilang helmet aron kini inpeksyunon kung kini lig-on o substandard. Kini kutob pa hangtod sa December 31 ning tuig.

Ang motorcycle owners kinahanglan nga magdala og photocopy sa motorcycles registration (official receipt/certificate of registration) ug valid ID sama sa driver’s license.

Ubos sa DTI-Bureau of Product Standards (BPS) Product Certification Scheme, ang tanan nga mga manufacturers ug importers sa motorcycle helmets kinahanglan nga magkuha og Philippine Standard (PS) license o ICC certificate sa dili pa ibaligya ang produkto.

Gibaharan karon sa DTI ang mga business establishments sa rehiyon nga dako nga administratibong kaso ang atubangon kung mapamatud-an nga namaligya og motorcycle helmets nga walay PS Mark o ICC stickers kini usab aron dili na mahasol ang mga driver susama sa nahitabo karon.

Nagbahad usab ang DTI ngadto sa mga driver nga dili puwedeng mokuha og mga ICC sticker gikan sa bisan unsa nga gamit nga ipulot nalang sa motorsiklo tungod kay adunay serial number nga alang lang sa helmet.

Ang balaod nga Republic Act 10054 nagahatag og seguridad sa mga katawhan labina sa mga driver nga kinahanglan gyod mosul-ob og lig-on nga helmet aron malikay ang fatal ug grabeng kadaot panahon maaksidente.