Zubiri magpapili og balik sa 2013

GIKUMPIRMAR ni kanhi senator Juan Miguel Zubiri nga magpapili siya sa umaabot nga eleksyon tuig 2013 ug niawhag kini sa katawhan nga pilion ang representante gikan sa Mindanao human maihap lang ang nagrepresenta sa tibuok Mindanao sa hawanan sa Senado.

Bisan sa ilang political conflict ni Senator Koko Pimentel, kinsa nagikan gihapon sa Mindanao, siya miawhag nga botaran kini aron adunay makatabang sa unya man ang hangyo sa mga Mindanaoan.

Si Zubiri ang kontrobersyal nga senador nga nagresign sa iyang pangatungdanan ug gihulipan ni Pimentel.

Gipasabot niini nga sa kasamtangan 24 ka mga senador, 19 niini nagikan sa Luzon, ug lima lamang ang nagikan sa Mindanao ug Visayas.

"Hopefully, in the next election, more representatives will come from our island," matud ni Zubiri sa usa ka press conference nga gihimo ning siyudad.

Gibutyag niini nga bisan og dili ganahan nga mahimo siya kapartido ni Pimentel iapil gihapon niya kini sa kampanya sa umaabot tungod kay malipayon kini nga adunay morepresesnta gihapon sa Mindanao.

Gibutyag niini nga magpasilong siya ubos sa Pwersa ng Masang Pilipino human personal nga giimbita ni Vice President Jejomar Binay.

Usa sa gilantaw ni Zubiri kung siya makadaog sa eleksyon mao ang environment, food security, education ug health.

Nilantaw gihapon kini nga apuron ang tanang lungsod sa Mindanao nga mahatagan og 1 milyon matag lungsod aron tabang ug patuman sa mga proyekto.