6 bata nahilo sa tuba-tuba

WALO ka mga bata ang pulos nilanding sa Northern Mindanao Medical Center (NMMC) ning siyudad sa Cagayan de Oro human nahilo sa liso sa tuba-tuba niadtong Sabado sa hapon sa lungsod sa Jasaan, Misamis Oriental.

Giila ang mga biktima nga mao sila si Ivy Vanilla, 6; Angel Mae Dolas, 5; igsuong si Lawrence, 6; Rendy Semihig, 5; Kyle Angon, 6; ug Joshua Noel, 6.

Gibutyag sa mga ginikanan sa biktima nga maoy nagdali og dala kanila sa NMMC ning siyudad nga nagdula dula ug nagbinalay ang mga biktima niadtong tungora. Naandan na usab sa mga biktima nga magdula labina kay adlawng Sabado ug walay klase.

Samtang nagdula nakuha ang ilang atensyon sa mga liso sa tuba-tuba ug ilang gipangkuha. Giingong nga gitunaw kini sa mga bata ug giinom sama sa usa ka juice.

Pipila ka minuto ang nilabay naglain ug nagsugod na sa pagsakit ang tiyan sa mga biktima ug nagsinuka na kini.

Daw walay lain nga gipasanginlan ang mga ginikanan kondili ang giinom nga liso sa tuba-tuba nga gitunaw labina dili lang kini ang unang insidente nga adunay nahilo niini.

Gidala ang mga biktima sa duol nga balay tambalanan apan giduso sa NMMC ning siyudad kinsa ubos pa sa obserbasyon sa mga doktor. (SVB)