Babaye’ng pusher sikop sa buy-bust

NAGTINGKAGOL sa prisuhan ang usa ka babaye human nasapon sa buy-bust operation sa mga sakop sa Philipphine Drug Enforcement Agency (PDEA) Northern Mindanao niadtong Sabado sa hapon sa Barra, lungsod sa Opol, Misamis Oriental.

Nasikop si Mercy Sebial, minyo, residente sa susamang dapit human nakuhaan og 17 ka pakete sa gituohang shabu nga mobalor og P45 mil, P500 marked money, ug pipila ka mga illegal drug paraphernalia.

Si Sebial ang taod-taod na nga giobserbahan, gipangita, gimonitor, ug gisunod-sunod sa mga tinugyanan sa PDEA tungod sa giingong kini maoy bagsakan sa mga ilegal nga druga gikan pa sa siyudad sa Marawi.

Daw usa ka dakong kalampusan sa PDEA ang pagkasikop niini tungod kay notadong mamaligyaay ug maoy nagpamaligya og illegal nga droga sa kasagpan nga bahin ug misulod pa sa pagpamaligya denhi sa siyudad sa Cagayan de Oro.

Giangkon usab ni Sebial sa mga PDEA Agent ang iyang mga pagpamaligya ug ingon man source sa ilegal nga drugas. Giandam na sa PDEA ang follw-up operation aron pagsuta kung tinuod ba ang gitug-an niining lugar ug source sa ilegal nga druga.

Samtang gibasulan og dako ni Sebial ang iyang pagkalambigit ug niangkon nga tungod lamang sa kapit-os ug kalisod mao nahimo niini ang pagpmaligya. Gibutyag niini nga sa iyang pangedaron wala nay modawat kaniya sa trabaho ug aduna siyay duha ka mga anak nga gibuhi.

Gibutyag niini nga andam siya nga magbag-o ug dili na himuon ang pagpamaligya kung hatagan og kahigayonan nga makalingkawas niini.

Apan ang PDEA desidido nga pasakaan kini og kaso supak sa Section 5 ug 11 sa RA 9165 kon Dangerous Drugs Act. Ang mga nakumpiskang illegal drug paraphernalia ang dalahon sa PNP Crime Laboratory alang sa masusing eksamin.