Central School nasunog

MOKABAT ngadto sa 52 ka mga classroom sa City Central School ang gilamoy sa kalayo kagahapon mga alas 1:30 sa kadlawon ning siyudad sa Cagayan de Oro.

Apan 46 ka lawak ang natala basi usab sa migawas nga spot report sa Bureau of Fire Protection (BFP) nga gihimo ni Senior Fire Investigator 2 (SFO2) Victor Naïve.

Mokabat og P3 milyones ang gibana-bana nga danyos.

Apan si City Central School Principal Porferio P. Padinit Jr. namahayag nga mokabat na ngadto sa 52 ka mga classroom ang nasunog nga gilangkuban sa 30 ka lawak sa mga tinun-an sa Grade 6, Grade 5 ug tulo gikan sa lawak sa Grade 3.

14 usab ka lawak ang naugdaw nga gi-okupa sa school division. Wala pay labot niini ang school canteen ug covered court sa maong tunghaan.

Gipasabot usab niini nga kung sutaon og maayo ug kwentahon mokabat sa P15 ngadto P20 milyones ang danyos sa sunog.

Matud ni Padinit nga usa kini ka dakong katalagman nga nahitabo sa tunghaan tungod kay hitso ug maayo na ang mga hitsura sa lawak apan sa usa ka pamilok kalit lang kining nasunog.

Si Vidal Castillo kinsa pangbuntag nga sekyu sa maong tunghaan ug usa ka Brgy Police sa Brgy 12 ang unang nakadiskubre sa sunog.

Niasoy kini nga nag-roving siya niadtong tungora isip barangay tanod. Iyang nakita ang pagsiga-siga sa kuryente sa lawak sa Grade 6 room assignment sa maestra nga si Mrs. Rosario hinungdan sa iyang kabalaka dihang nahimo kining kalayo ug kalit kaayo ang pagsilaab.

Tungod kay walay cellphone nga dala, gidagan niini ang entrance gate nga bahin ug gipahibalo ang security guard nga panggabiing ni-duty. Gisugo usab niya and nagduty sekyo nga ipaadto ang Fire Station aron makaresponde.

Giingong 20 minutos usa miabot ang BFP diin dako na kaayo ang kalayo ug mikaylap na kini sa kasikbit nga mga classroom.

Mga alas 4:30 sa kadlawon, gideklarar nga fire out sa BFP ang sunog ug padayon sa pag-refill sa ilang firetruck human namatikdan pa ang pagsige og aso ug aduna pay namatikdan nga mga kalayo nga anaa sa punoan sa kahoy.

Giimbestigahan pa sa mga bombero kung tinuod ba nga faulty elecrtrical wiring ang hinungdan sa pag-ulbo sa kalayo.