Sakop sa Batang Mindanao giihaw
-A A +AThursday, August 16, 2012
GIGULGOL ang liog ug napuno sa dinunggaban ang usa ka sakop sa Batang Mindanao (BM-29) nga napalgang wala nay kinabuhi ilawom sa kalubian kagahapon mga alas 5:00 sa buntag sa Zone-1, Upper Bantiles, Bugo ning siyudad sa Cagayan de Oro.
Giila ang biktima nga mao si Christopher Lagunay, 35, adunay kapuyo, taga P-2, Tablon ning siyudad.
Sa pakighinabi sa Sun.Star SuperBalita ngadto kang SPO1 Efren Ellevera sa Police Station 6 (PS6) sa Puerto, gibutyag niini nga blangko pa sila sa pag-ila sa responsabli sa krimen.
Matud ni Ellevera nga niadtong nilabay’ng katuigan, gikasohan ang biktima og illegal possession of firearms human nakuhaan og shotgun.
Giingong suspek usab ang biktima sa sunod-sunod nga pagpanulis sa dapit ingon man pagpangawat. Pipila na usab ka higayon kini nga napriso sa prisuhan sa PS6.
Matud ni Ellevera nga dili kini binuhatan sa vigilantes sukwahi sa nanggawas nga taho ug posibleng adunay kaaway gyod sa biktima.
Sa pagsulat ning balita, nagtigom pa og ebidensya ug nangita og testigo ang kapolisan sa nakakita sa krimen aron maila ang suspek.
Ang patay’ng lawas gidala na karon sa Everlasting funeral homes.
Gipatik sa mantalaang SuperBalita Cagayan de Oro Agosto 17, 2012.
Balita
Forum rules: Do not use obscenity. Some words have been banned. Stick to the topic. Do not veer away from the discussion. Be coherent and respectful. Do not shout or use CAPITAL LETTERS!
