4 libo ka graduate makatrabaho

DAKO na ang kahigayunan nga makakita ug trabaho sulod sa usa ka bulan human ang National Statistics Office (NSO) mag-hire ug mga enumerators sa gikatakdang nationwide census on agriculture and fisheries karong umaabot tuig 2013.

Gibutyag ni Janith Aves, kinsa statistician sa NSO-Northern Mindanao, nga nahinabi sa Sun.Star SuperBalita nga sugod sa bulan sa Oktubre magdawat na sila ug aplikasyon sa mohimo niini. Apan mas prayoridad nila ang mismong residente sa mga lugar kung asa dapit himuon ang census.

"Kung taga Opol sila, sa Opol ra sab sila maghimo sa census kay nakabalo man sila sa ilang area," pasabot ni Aves.

Gipasabot niini nga dako kini nga oportunidad sa mga batan-on nga wala pa makatrabaho mahitungod kay muabot sa 4 libo ka mga enumerators ang dawaton sa NSO-Northern Mindanao.

Ang mga census enumerators gikatakdang mohimo sa census sa tanang puloy-anan ingon man establismento nga adunay kalambigitan sa agrikuluta ug fisheries sugod February 2013 aron magkuha ug mag-compile sa impormasyon sa fishery sector sa nasod.

Kini mao ang prayoridad sa NSO ug gipahibalo atol sa consultative forum sa conduct of 2012 Census of Agriculture and Fisheries (CAF) nga gihimo niadtong August 13 sa Chali Beach Resort Conference Center.

Gipasabot ni Dr. Salvador A. Aves, regional director sa NSO, nga ang pagkuha sa census importante aron ma-generate ang statistics ug ma-mobilize ang mga resources labina gyod pag-abot sa kalamboan sa agrikultua ug mga oportunidad. (SVB)