Gidagit nga batan-on wala masayri asa gidala

HANGTOD sa pagsulat ning balita wala pay kasayuran kung asa dapit ang nahimutangan sa gidagit nga batan-on ug pag-umangkon sa usa ka negosyante niadtong nilabay’ng adlaw sa Divisoria ning siyudad sa Cagayan de Oro.

Unang lakang nga gihimo sa Cagayan de Oro City Police Office (Cocpo) mao ang pagmugna ug Task Force Pau nga maoy mangita sa biktima ug makig-negotiate sa mga kidnapper.

Si Pau Rasuman, 27, lumad nga taga Marawi, ang gidagit ug pwersadong gipasakay sa sakyanan human gibabagan ang sakyanan sa biktima sa wala mailang mga suspetsado, dihang nidumili sa pagawas ang biktima gibunalan ug bato ang windshield niini.

Ang kapolisan dako ang pagtuong adunay kalambigitan ang pagkadagit niini sa pyramiding scheme nga gikalambigitan sa uyoan niini diin nagsilbi usab nga agent ang biktima.

Adunay nadawat ang kapolisan nga gidala na ang biktima sa Lanao del Sur, apan dili pa kumpirmado kung asa dapit sa maong lugar kini nahimutang.

Gani si Mayor Vicente Emano nihangyo ug nagyukbo sa nidagit sa batan-on nga unta dili kini pasakitan o pasipad-an tungod kay kung motibo mao ang kagubot sa pyramiding scheme gipasabot niini nga walay labot ang biktima ug nganong balusan man kini.

Gikapungot usab pag-ayo niini ang taho nga adunay mga armadong mosulod sa lugar.

"Hinaot inyong respituhon ang siyudad. Ayaw na ninyo hulata nga bisan mga opisiyal dili na makahupot og armas sulod sa siyudad kay akong imando nga pangkuspikahon kana," matud sa mayor.