Gipatay samtang natulog

GIUNAY ug luba sa iyang kainom ang usa ka lalaki nga natulog na niadtong Huwebes mga alas 7:35 sa gabii didto sa lungsod sa Libona, Bukidnon.

Giila ang biktima nga mao si Arnel Meranes, 37, taga Lantoran, susamang lungsod.

Gisaysay sa asawa niini nga maoy nidali ug dala sa biktima sa Northern Mindanao Medical Center (NMMC) ning siyudad sa Cagayan de Oro nga nag-inom ang biktima kuyog ang kaila niining nailhan lamang sa apelyido nga Magto ug nagkasabot nga didto sa duol nga videokihan mag-inom.

Human sa kanta ug apektado na kaayo sa ilimnong makahubog nakatulog sa videokihan si Meranes apan giingong gipukaw pa kini sa suspek ug dihang dili na gyod mumata giingong deretsong giluba niini gamit ang kutsilyo.

Maayong pagkaigo sa dughan duol sa kasing-kasing si Meranes ug dali sab dayon misibat ang suspek human sa pagpangluba.

Si Meranes dali usab nga gidala sa ospital sa maong dapit apan tungod kay talangdugon man ang kahimtang niini gibalhin sa NMMC ning siyudad apan mga alas 10:35 sa gabii nakabsan si Meranes sa iyang kinabuhi.

Giingong posibleng nasuko ang suspek nga gikatulgan sa biktima labina gusto pa kini moinom ug daghan. Apan mitumaw usab ang taho nga daan na nga adunay panagbikil ang duha.

Ang kaso karon giatiman na sa Libona Police Station samtang ang patay’ng lawas gibalik na sa puloy-anan sa Libona.