Driver nabanggaan, patay

NAKABSAN gyud sa iyang kinabuhi ang usa ka sikad driver human gi-hit and run sa wala mailang sakyanan niadtong Sabado mga alas 7:00 sa gabii duol sa tulay sa Manticao, Misamis Oriental.

Giila ang biktima nga mao si Mario Decena, 47, minyo, nagpuyo sa Barangay Linangcayan, susamang lungsod ug nanginabuhi pinaagi sa pagmaneho og trisikad.

Gisaysay sa paryente sa biktima nga wala gyud sila masayod kung unsa ang kinatibuk-an nga nahitabo tungod kay ila na lamang nadawat nga nagbuy-od na ang biktima, naligo sa iyang kaugalingon dugo daplin sa kalsada ug giingong nabalitok na usab ang gidrayban niining trisikad.

Daling gitabang ang biktima ug gidala sa Northern Mindanao Medical Center (NMMC) ning siyudad sa Cagayan de Oro apan giingong “brain dead” ang biktima apan padayon ang pulso sa pagpitik hinungdan nga gitabang pa kini og ayo sa mga doktor.

Mga alas 2:00 kagahapon sa kaadlawon, nakabsan gyud sa kinabuhi ang biktima sulod sa emergency room.

Ang Manticao Police Station nangita na og witness kinsay nakakita sa hitabo aron maila kung unsa nga sakyanan ang nakabangga niini.