2 patay sa bangga

DEAD on the spot ang driver ug backrider human nabangga ang motorsiklo niadtong nilabay’ng adlaw sa Barangay Aplaya, lungsod sa Jasaan, Misamis Oriental.

Patay ang driver sa XRM motorcycle nga mao si Jovan Hirap, hingkod ang edad, taga Dayawan, lungsod sa Villanueva, Misamis Oriental. Samtang wala pa maila ang angkas niini basi sa blotter nga gihimo ni Traffic Investigator Henry Gordon.

Si PO2 Christopher Tusara sa Jasaan Police Station nibutyag sa Sun.Star SuperBalita nga naengkwentro sa motorsiklo nga gimaneho ni Hirap ang KIA Sportage nagdala og plaka KDR 936 gipanag-iyahan ug gimaneho ni Ronaldo Limbaco, taga lungsod sa Medina, Misamis Oriental kinsa pauli na niadtong tungora.

Sukwahi ang direksyon sa KIA ug Motorsiklo apan basi sa mga nakasaksi giingong mi-overtake ang motorsiklo sa usa ka sakyanan ug giingong nangawat kini sa pikas linya miresulta sa pagkasungag sa duha.

Tungod sa sobrang kakusog sa bangga dili tiaw ang kadaot nga naangkon sa duha ka mga sakay sa motorsiklo, bali, bun-og ug samad sa ulo ang naangkon sa duha hinungdan nga dead on the spot. Walay nasamadan sa sakay sa Kia.

Ang patay’ng lawas gidala na ning panahona sa Galeon funeral homes samtang ang Kia ug motorsiklo ubos sa kostudya sa Jasaan PNP. Ang driver kasamtangan nga gidetained sa priosuhan apan gituohang adunay nahitabong settlement. (Stephanie V. Berganio)