P2 milyones naransak

PADAYON pa nga gisuta kung pila gyud ang kantidad nga nawala apan gikabutyag nga mokabat ngadto sa P2 milyones ang nakuha sulod sa vault nga nadiskubre kagahapon mga alas 8:00 sa buntag sa Gothong Shipping Lines Company nga nahimutang sa Licoan St., Puntod ning siyudad sa Cagayan de Oro.

Nadiskubre ang pagpangransak dihang usa ka empliyado ang mo-duty unta kagahapong adlawa apan natingala dihang abri na ang pultahan sa atubangan nga bahin ug gituohang giligwatan ang yabe ug giguba ang pultahan hinungdan sa pagka-abri ug pagsulod sa mga kawatan.

"Lock gyod na ang pirtahan pero pagsulod nako natuklod deretso ug naabri, mao nga nagtuo ko nga basin naa nay kauban nako pero sunod nga niabot akong mga kauban ug among nadiskubre nga gikawatan gyod mi," saysay sa empliyada nga nakadiskubre.

Gani niadtong Domingo aduna pay duty ang mga pipila ka empliyado ug taman lang sa alas 3:00 gisirado ra usab dayon.

Maoy ilang nakita nga natangtang na ang lock sa vault nga maoy sudlanan sa kwarta nga koleksyon niadtong Biyernes ug Sabado. Gituohang giligwatan usab kini og stool aron kini maabri. Ang pirtahan usab sa vault anaa na nakatungtong sa lamesa nga bahin.

Si Police Senior Inspector Norberto Zafra hepe sa Police Station 5 (PS5) sa Macabalan kinsa maoy nangulo sa imbestigasyon niingon nga posibleng planado ang pagpangransak tungod kay adunay mga special tools nga gipanggamit aron mabuksan gyod ang vault.

Dili pa usab madetirminar kung pila ang nakuha nga kantidad apan adunay nakasulti hinuon dili pa kumpirmad nga mokabat ngadto sa P2 milyones ang sulod sa vault wala pay labot sa pipila ka importanteng butang nga nawala.

Gisusi usab sa Scene of Crimes Operatives (Soco) ang insidente ug gikuha labina gyod ang mga fingerprints kung pila man kabuok ang suspek niini.

Samtang ang manager sa maong kompanya niingon nga mohimo pa sila og general inventory tungod kay dili pa ma-specify kung pila gyod ug unsa nga mga butang ang nakuha apan nagtuo kining ang kita gyod sa Biyernes ngadto sa Domingo ang apil sa nakuha.