Babaye gitigbas sa bayaw

NAKAANGKON ug samad sa likod ug atubangang bahin sa lawas ang 53 anyos nga babaye human gitigbas sa iyang bayaw niadtong Lunes mga alas 8 sa gabii sa Barangay Lumbia ning siyudad sa Cagayan de Oro.

Giila ang biktima nga mao si Manilyn Lumapac, minyo, sa susamang dapit.

Gitumbok nga ang suspetsado mao ang bayaw niini nga giilang si Jayson Malaga, 32, minyo, ug nagpuyo sa susamang dapit.

Ang asawa ni Jayson nga mao si Marialyn kinsa igsuon sa biktima ang nisaysay nga dugay na kayo ang panagbangi ni Manilyn ug ni Jayson sukad bag-o pa sila nga minyo lima ka tuig na ang nilabayng.

Daw kanunay niini padungog-dungugon si Jayson nga daw wala kaayo kahatag sa igsuon ug daw kanunay pa niining libakon. Gihulagway ni Marialyn nga daw murag nakaminos sa iyang bana ang iyang igsuon.

Uwahing insidente dihang nakauli si Jayson nga adunay dala nga pagkaon gikan sa birthday sa ig-agaw ninii ug tungod kay daghan man ang dala niini gipahatagan niini si Manilyn nga silingan ra sa dapit. Apan natingala dihang nagsabaay kini ug giuli ang gihatag nga pagkaon.

Sa kasuko ni Malaga mikuha kini ug sundang ug gitigbas si Manilyn miresulta sa pagkaigo sa iyang likod ug bahin sa may bukton.

Ang biktima gidali ug dala sa Northern Mindanao Medical Center (NMMC) kinsa luwas na sa makuyaw’ng kahimtang. Gituohang mas modako pa ang kagubot human desidido ang biktima nga pasakaan ug kaso ang suspek. (SVB)