Babaye patay sa bangga

NAKABSAN sa iyang kinabuhi ang usa ka babaye human nabanggaan niadtong Lunes mga alas 9:29 sa gabii atubangan sa dakong unibersidad sa Lapasan ning siyudad sa Cagayan de Oro.

Walay nakaila sa biktima hangtod ning pagsulat sa balita tungod kay human nabanggaan ang biktima igo lang dayon kining gidala sa Northern Mindanao Medical Center (NMMC) sa usa ka nagpakabana’ng katawhan sa dapit.

Giingong mitabok ang biktima apan mao na lamang ang nakita nga nagbuy-od na kini taliwala sa kalsada maayo na lamang adunay nakakita niini.

Nagsul-ob ug kolor pula nga sinina ang biktima, kolor blue nga shortpants ug walay bisan usa nga identipikasyon niini. Gibana-banang anaa sa 40 ngadto 50 anyos ang babaye.

Gani sa pagdala sa biktima sa NMMC buhi pa kini apan apektado kaayo ang ulo sa biktima nga gitouhang nabunal. Apan tungod kay kritikal man ang kahimtang niini nakabsan gyod sa iyang kinabuhi ang biktima pipila ka oras gikan pagdala niini.

Ang personahe sa Bollozos funeral parlor diin gidala ang patay’ng lawas sa biktima niingon nga wala pa gihapon tagtungod nga miduaw sa biktima ug nanawagan sila nga unta bisitahon kini sa pamilya nga nawad-an ug sakop.