Pagpangluba sa beach

DUHA ka mga kaso sa pagpangluba ang nahitabo sa nagkalain-laing beach resort niadtong Lunes sa gabii dinhi sa Misamis Oriental.

Ang unang insidente natigayon mismo sa Bonbon Beach ning siyudad sa Cagayan de Oro diin nag-unay ang magsuong Rosevel Butaya, 29 ug Luminado Butaya Jr., pulos taga FS Catanico ning siyudad.

Nasayran nga unang nag inom ang duha uban usab sa laing sakop sa pamilya apan giingong kalit lang nagbikil sa storya ang duha nga misangpot na hinuon sa grabeng panaglalis. Daw kalit lang mikuha ug kutsilyo si Luminado ug deretsong giluba ang isguon hinungdan sa pagkaigo sa tiyan niini.

Gidali pagdala ang biktima sa Northern Mindanao Medical Center (NMMC) kinsa ubos pa sa obserbasyon sa mga doktor. Ang pamilya walay plano kasuhan si Luminado tungod kay daw pamilya ra ug ma-settle ra kini sa umaabot.

Ang ikaduhang insidente natigayon sa usa ka beach sa lungsod sa Opol, Misamis Oriental. Giila ang mga biktima nga mao sila si Bryan Hangao, 26, ug Lony Gabo, 23, pulos taga Baikingon ning siyudad.

Nasayran nga nag-overnight ang duha ug nag-inom niadtong tungora ug ilimnong makahubog. Apan naengkwentro sa duha ang pipila ka mga bystanders sa maong lugar miresulta sa panag-away ug paglubaay.

Samaran sa ulo ug likod si Gabo samtang sa tiyan nga bahin si Bryan kinsa pulos gipangdala sa (NMMC).

Sa kasamtangan, giobserbahan pa sa mga doktor ang mga biktima samtang ang mga suspek padayon pang giila sa Opol Police Station. (SVB)