Pipila ka pulitiko nagpatuong Liberal party

GIINGONG pipila sa mga politico, dili lang sa Misamis Oriental apan sa probinsya sa Bukidnon, ang giingong nagpatuong mga miyembro ug sakop sa liberal party.

Kini ang gibutyag sa Liberal Party-Bukidnon Chapter (LPBC) Spokesperson atol sa interbyu sa Sun.Star SuperBalita.

Niadtong nilabay’ng mga adlaw mokabat sa 200 ka mga miyembro sa LPBC ang nagtigom ug nagpaila alang sa umaabot nga 2012-2013 election.

Ang tigpamaba sa LBCP kinsa nidumili pa sa paghatag sa iyang pangalan atol sa interbyu nga usa sab sa rason nganong usa ka panagtigom ang gihimo aron iklaro nga adunay pipila ka pulitiko sa dapit ang nagpatuong miyembro sa Liberal Paty bisan ug dili.

Dugang niini nga andam na kaayo ang ilang grupo sa umaabot nga piniliay, kini human sa pagtigom nga gihimo mismo ni Deputy Speaker Lorenzo Tañada, Congressman sa 4th District sa Quezon City, pinaagi sa usa ka oath taking ug mid-term meeting nga bag-ohay lang gihimo didto sa usa ka hotel sa Maramag Bukidnon niadtong Agosto 5 ning tuiga.

Atol sa kalihokan giproklamar ni Tañada ang iyang tinguha nga magpapili pagkasenador ubos sa Liberal party.

Laing mga kandidato nga ubos sa bando ni Presidente Benigno Aquino III ug gituohang magpapili isip senador mao sila si Tolesito Umali, Tesda Secretary Joel Villanueva, magsuong senator Pia ug Allan Peter Cayetano, Ed Angara, Rozzano Rufino "Ruffy" Bunoan Biazon, congresswoman Liza Honteveros, Cynthia Villar, senator Antonio Trillanes IV ug Aquilino "Koko" Pimentel III kinsa nagsilbing guest candidate.

Dugang sa tigpamaba nga ang mga lokal nga kandidato sa Bukidnon nga gikatakdang modagan isip gobernador ug magrepresenta sa LPBC mao si Bukidnon Representative Jess Paras kinsa makigkontra ni Vice-Governor Jose Ma. Zubiri isip Bukidnon Province Governor kinsa unang gikatahong sakop sa Liberal Party.

Apan ang tigpamaba nipasabot nga dili sakop si Zubiri sa Liberal Party ug ingon man pipila ka mga politiko o grupong nagpatuong mga miyembro sa liberal party.

Pipila ka adlaw gikan karon ilusad usab ang local nga Liberal Party dinhi sa Misamis Oriental apil na ang line-up sa mga politiko nga ubos niini.

Giingon nga kaarangan nga masakop sa Liberal party tungod kay ubos kini sa Administrasyon.