Lalaki naghikog, patay

GAMIT ang usa ka wire sa kuryente naghikog patay ang usa ka lalaki kagahapon mga alas 5 sa kaadlawon sa punoan sa Kamatsile sa Bulao, Iponan ning siyudad sa Cagayan de Oro.

Giila ang biktima nga mao si Sandy Yañez, 35, minyo, residente sa San Simon, ning siyudad, ug nag-abang sa Iponan.

Si Yañez nagtrabaho sa pabrika sa hollowblock sa dapit ug anaa sa production nahimutang. Gihulagway kini nga walay libog, buotan, ug walay bisyo.

Si Jimmy Mahinay kinsa suod nga kaila ni Yañez nisaysay nga uwahi niya nga nakita ang biktima sa iyang tindahan ug nagtambay.

Iya kining gihanggat nga makig-inom tungod kay suod kini kaayo labina kay pamahaw ug panihapon anaa kini magkan-anan sa ilang tindahan. Pamasin ra usab ang paghanggat niini labina kabalo man siya dili kini moinom.

Apan mibalibad kini ug nihangyo nga mohulam ug P500 tungod kay walay kwarta mibalibad si Mahinay ug iyang namatikdan nga milakaw ra usab dayon si Yañez.

Mao na lamang ilang nadiskubre kagahapon sa buntag nga nagbitay na kini sa punoan sa kamatsile, naghikot ug wire sa iyang liog, ug wala nay kinabuhi.

Bisan ang Police Station 7 (PS7) sa Bulua, blanko kaayo kung unsay rason sa gihikugan sa biktima labina hilumon ug dili kaayo kini dayag sa iyang mga problema. Gisuta pa usab kung wala bay foulplay sa kamatayon niini.

Ang patay’ng lawas anaa gidala sa St. Peter funeral parlor.