Emano: Drama lang ang petisyon kontra kang Moreno

"Drama Lang."

Kini ang tipik sa komento ni Cagayan de Oro City Mayor Vicente Emano sa pipila ka mga grupo nga mipetisyon nga i-dismis ang aplikasyon ni Governor Oscar Moreno kalabot sa pagduso niini pagbalhin og residency dinhi sa siyudad sa Cagayan de Oro.

Gibutyag sa Mayor sa iyang sinemanang programa sa usa ka sibyaan sa radyo nga wala siya kaila sa unom ka mga tawo nga nagpetisyon kang Moreno.

"Pasayloa ko nianang mga tawhana ug basin unya og drama lang kana niya (Moreno). Aron ipaabot nga ako ang nagsugo ug nimaniobra nga magpetisyon," butyag ni Emano.

Gipaabot usab niini nga dili mao ang lakang sa unom ka mga tawo nga nag-file og petisyon kang Moreno tungod kay walay bisan kinsa nga mokwestyon kung adunay usa ka tawo nga mobalhin sa iyang residency.

"Dili man sayop, kay kung ako ang magpasaka ang ingon i-disqualify is dapat dili i-disqualify. Ang gepetisyon unta nila kung angayan paba nga magserbisyo si Moreno sa lalawigan kung nagbalhin na siya sa iyang residency."

Gibutyag usab niini nga nakalatid sa balaod nga kung nagduso ka ug nagbalhin sa residency daw kinahanglan nga mobiya sa iyang katungdanan ug muresign.

"Nganong dili niya biyaan?" pangutana sa Mayor.

Nagtuo ang Mayor nga dili magmalampuson ang maong petisyon.

"I do not think nga he can be disqualified kay gihimo ko sad kana niadto ug wala man ko gikwestyon mao nagpadayon ko pagkagobernador," angkon niini. Sa kasamtangan daw wala siyay plano nga magpetisyon sa unsaman kang Moreno tungod kay bukas siya nga modagan kini sa siyudad sa eleksyon.

Gibutyag usab niini nga ipapadayon kini sa pagdagan sa siyudad ug dili angayan nga i-disqualified.

Kahinumduman nga nagpasaka og petisyon ngadto sa buhatan sa Commission on Election sila si Edgardo Roa, Alejandro Responte, Agripino Caneos ug uban ug mikwestyon sa pagbalhin og residency ni Moreno.

Nadawat na lamang ni Moreno ang sulat gikan sa Comelec nga tubagon ang maong petisyon niadtong August 15.

Ang Election Registration Board (ERB) nihimo og summary hearing sa petisyon niadtong Miyerkules.

Samtang si Gobernador Moreno uban ang iyang legal counsel naglaom nga ma-dismiss ang maong petisyon.

Gipasabot sa abogado niini nga dili mawad-an sa katungod ang gobernador sa iyang Constitutional Rights tungod lamang kay pipila ka mga oposisyon dili gusto sa iyang pagpahibalo ug tinguha nga modagan sa sunod nga eleksyon sa siyudad.