Seguridad alang sa pista mas gipahugtan

DUHA ka adlaw gikan karon saulogon na sa siyudad sa Cagayan de Oro ang kapistahan sa patron nga si Senior San Agustin.

Sunod-sunod ang mga kalihokan ug aduna pay nakahan-ay nga lain nga mga kalihokan karong adlawa hangtod sa katapusan sa bulan.

Apan pipila sa katawhan ug mga bisita sa siyudad ang nakapangutana kung kumusta ang seguridad sa siyudad labina bag-ohay lang pipila ka mga pagpanulis ang nahimo sulod lang sa 24 oras, aduna pay gidagit nga batan-ong muslim, pagpangransak, ug uban pa.

Si Mayor Vicente Emano mipasalig sa hapsay ug malinawon nga kasaulogan sa pista. Iyang gimando ubos sa liderato ni konsehal Ian Mark Nacaya, kinsa tsirman sa Police ug Fire and public safety sa konseho, nga pahugtan ang seguridad.

Kini naglakip sa pagdili og dala sa mga ilegal nga armas nga makasulod sa siyudad.

Gani, si Nacaya naghanyo ug dako nga pwersa gikan sa PNP-Northern Mindanao aron malikayan ang kadaot sa siyudad, pagsiguro nga walay mga dautang elemento nga makasulod sa entrance, exit, ports ug airport nga makasulod sa siyudad.

Samtang gipahibalo usab ni Cagayan de Oro City Police Director Gerardo Rosales nga mokabat sa usa ka libo ka mga police personnel ang gikatakdang i-deploy sa nagkalain laing dapit sa siyudad pagsiguro lamang malikay ang katawhan ug mga langyaw nga mabiktima sa krimen.

Mokabat sa 300 ka mga police recruits ang gihangyo aron i-deploy, diin and 150 niini gikan sa Regional Public Safety Battalion (RPSB).

Laing 300 ka mga personahe gikan mismo sa Cocpo ang i-deploy. Usa ka Oplan San Agustin ang gitawag niini aron hapsay ang kasaulogan karong Lunes ug Martes.

Gawas sa deployment sa nagkalain laing area aduna gihapon mga polis nga nakabantay labina sa mga nagkalain laing kalihokan sa siyudad.